今個月有朋友嘅狗狗往彩虹橋上路, 從佢唔舒服到離開, 祇係經歷咗短短兩個月左右, 雖然話生死有個定數, 時間要到就點都留唔到, 狗狗速速咁走, 唔使比病魔折磨長時間受苦, 係仲好!
但...講嘅一套, 感受每每係另一套, 要同心愛嘅寶貝話別, 從此再見唔到, 摸唔到, 要咁灑脫從容面對, 我做唔到!
 |
| Link: mp4 |
好多時都會諗起豆b, 回想同佢一齊抗病打仗嘅日子, 好感恩佢願意比我照顧; 豆b真係好乖, 有病唔舒服點會有胃口? 但佢都配合我, 盡努力將食物吞落肚!
除咗偶爾反抗攪到嘴邊污糟, 大部份時間都表現好好, 貼心嘅豬豆留比我好多同佢共處嘅美麗回憶, 當我諗起佢時感覺心痛, 我就用開心嘅回憶填補!
近日屋企嗰兩隻豬寶寶, 時而唔食時而胃口好好, 我已經出盡八寶, 真係無符; 當諗起佢哋已經年老, 十歲半嘅狗生算係行咗大半路, 個心好驚好怕嗰日嘅來到!
每日上FB睇嗰D講老、講病嘅群組, 都同生離死別, 疾病催殘嘅issue接觸, 吸收好多負能量, 攪到個心好唔舒服, 以後都係唔睇咁多仲好!
一連串嘅情緒反射, 可能係因為訂做嘅豆b紀念肖像牌, 剛收到, 呢個牌等咗兩個幾月先造好!
當速遞送到, 望住個盒好緊張, 一打開面對成品嘅剎那, 好激動 (實物真係同相片有距離, 實物好逼真)!
店主手功真係好, 做得好似豆b, 連神韻都似, 仲有係...佢做到年紀大咗嘅豬豆, 同之前嗰個浮雕感覺唔同!
呢個豆b, 係記憶猶新, 最後階段同我時刻共渡, 我最熟識嘅豬豆啊😭!
望住呢個紀念品, 眼眶紅晒眼淚打滾, 既心酸, 又難受!
好多謝店主將豆b做得咁神似, 亦多謝阿女為我題字, 雖然佢話個牌唔太平滑, 寫得唔靚, 但我好鍾意!
"GONE but not FORGOTTEN" yes!!!!
從無諗過失去豆b會咁失落, 原來佢嘅存在, 對我哋一家有好大意義, 即使我哋已經再見佢唔到, 但喺我哋嘅心裡面, 永遠都有呢個女嘅位置!
 |
| 豆b, 好掛住你啊! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
