2018年10月31日星期三

笑中有淚

The last Halloween of Dau b

用一張三年前嘅舊相, 祝大家2018萬聖節快樂!
無預計我會番睇呢D過去嘅節日相, 祇因阿女需要晒幾張相出嚟, 而晒相都有最低消費, 佢就問我有無相要print 出嚟; 我一向都有一個folder, 集齊要晒嘅相片, 等儲夠數目一齊!

其實晒相現今已經唔普及, 大家都習慣上電腦睇, 既容易管理又慳儲存相簿嘅位; 但我一直都習慣將3隻豬嘅過節相片晒出嚟, 再按節日分別放落唔同相簿, 然後對照吓佢哋每一年嘅變化, 拎住實物一頁頁咁揭去睇, 方便過拎住隻老鼠, 碌來碌去咁每年搵出嚟!
但自從豆b離開後, 我無再影過節相, 都應該無相片要晒出嚟, 而當日我愛不惜手嘅相簿, 更無勇氣拎出嚟睇!

因為晒相湊數, 就即管打開個晒相folder睇一睇, 發覺儲存住2016年嘅端午節相, 原來仲未晒出嚟!
2016年嘅中秋無影相, 因為豆b病重, 已經無心情做大project, 當年嘅端午係3隻豬一齊, 最後影嘅過節相, 但我記得, 當日豆b已經無胃口食粽, 今日睇返呢D相, 諗起當時情境個心仲係痛!

呢輯相, 一放兩年多, 今日晒好, 懷住五味架般心情, 放返落端午節相簿!
再一次過重溫所有過節相簿, 回味咁多年來, 每個節日同3隻豬仔開心共渡, 每揭起一頁, 都想起當年做主題佈景嘅趣事, 為咗氹佢哋坐好, 出盡八寶😊, 豆b為咗我手上嘅零食坐到屁股仔彈高, 仲唔肯坐定飛撲過嚟我度....
當日比佢激到我跳舞, 今日回想, 笑中有淚, 淚眼模糊!