唔知係年紀大咗, 還是病菌勁咗, 感覺每次有病都要拖好耐先勉強算好D; 今次雖然唔算好病, 但頭重重又喉嚨痛, 被迫要睇醫生食抗生素, 食到腳步浮吓浮吓都頗辛苦, 但溫和嘅治療方法又對付唔到咁強勁嘅病毒, 醫生話我扁桃腺發炎都幾嚴重😣, 喉嚨有白點亦全紅, 唔怪得有發燒咁快速!
食西藥係可以好快控制好, 不過就成個人都唔舒服, 好似唔可以腳踏實地魂遊太空; 即使係咁, 我都一樣挺住帶波波做激光治療, 盡量將療程一氣呵成, 唔想斷斷續續, 希望咁樣會療效提高啦!
已經每星期一次連續做咗7次laser therapy, 效果無見到好明顯進步, 但又唔可以話幫助全無, 波波係關節移位問題, 唔做手術係無可能根治到, 但即使做手術亦唔係一定好, 波波年事已高, 開創手術後引發關節炎風險相對亦提高, 仲加上太多因素, 由始至終無考慮過手術, 只週邊幫助佢唔會痛!
還好一直以來, 波波都無表現痛苦, 最差情況係跛跛吓咁行得唔好, 亦唔係持續唔可以正常行路, 可能係關節挫位時佢唔敢用力, 靠一邊身體去支撐時就較難穩住腳步!
依家做嘅係幫佢舒緩受力唔平均嘅肌肉, 保住佢唔會長期受壓引起疼痛, 除咗做激光我亦有跟P姐姐教嘅按摩幫佢卸力, 加埋艾灸效果都幾好, 呢個星期算行得好好😊!
打算做多一，兩個月物理治療, 睇睇情況再決定下一步, 現階段唔諗咁多按部就班繼續去做!
呢段時間達達平穏咁過, 都係惡死騰騰日日閙人, 不過有火當然好過無火, 太溫純仲嚇死我😜; 多謝老天眷顧唔使我憂慮更多, 處理一隻豬仔身體有事精神體力已經好大虛耗, 真係好難再更多兼顧!
但願日子平安順瑞, 可以比我放慢腳步!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
