朋友話呢排我不停講住波波, 唔見我提起達達, 問達達近況如何!
都係嗰句啦, no news is good news, 達達近來無咩唔妥, 當然有咗個長期病, 心臓有事無可能話佢健康, 但可以keep住情況穩定, 近來胃口算唔錯, 無突發變故彈出嚟嚇我, 我唔想諗太多, 奉行煮到嚟就食, 阿Q精神也好, 鴕鳥政策也好, 可以咁落去我已經好安樂🙏!
不過呢個女依家唔肯食菜, 加菜粉都唔啱, 少咗食物纖維當然無咁好, 要隔日先有poo poo 囉!
波波腳仔情況都無大改進, 反反覆覆, 時好時壞, 我已經出盡板斧, 居家復健每日都做, 但效果唔算好, 不過佢就好enjoyed艾灸, 每次都揹住個艾灸盒瞓到儀態全無😁!
睇網上資料, 話艾灸效力好大, 可能做緊當下有改變無明顯見到, 實則健康喺不知不覺間會逐漸進步, 反正個仔受落, 我點會偷懶, 最開心係依家摸佢腳掌仔好溫暖, 當然希望堅持住做, 健康會慢慢轉好!
睇咗某FB群組留言, 話狗狗又係腳仔行得唔好, 情況好反覆, 最後確診係骨癌😱...
雖然睇咗呢類留言個心有唔舒服, 但我就無對號入座, 呢個反應同以前嘅我有D唔同!
可能經歷多咗, 亦奉行只面對當日嘅煩惱, 太多無奈唔到我點諗點計劃, 明日嘅煩惱留待明日面對就好!
琴日見到好朋友網上嘅留言, 話帶狗狗見醫生, 醫生話狗狗腎衰情況唔太好, 正在平穏咁退步, 朋友聽到即時眼淚忍唔到😢; 呢個朋友為狗狗真係盡心盡力, 眠乾睡濕咁湊幾隻毛孩, 但天意難違, 每個生命歷程上天早規劃好, 任你點努力去做都改變唔到, 不過我哋仍可以盡力, 令佢哋嘅過渡期過得無咁辛苦啦!
早幾日又聽聞朋友嘅朋友狗狗上咗彩虹橋, 呢隻小芝芝雖然我從未見過面, 但不時會聽朋友提起, 對於佢嘅離開都係傷感難免, 從來最難面對都係生離死別, 即使你係一向灑脫!
寄語媽媽保重, 感恩能夠好好去愛, 好好一齊生活, 到最後好好告別…
要記取好時光, 大家互勉💖!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
