係咪要關閉呢個blog? 每次報完平安都好唔掂😓!
我一向醒瞓, 尤其養咗呢幾隻豬仔, 當佢哋身體有事後, 好似從來唔敢瞓得安心; 琴晚黎明時份, 聽到波波喺網床發出翻滾嘅聲音, 即刻跳落床睇吓又有乜事發生, 就見到波波好似之前咁, 坐喺度猛轉好似企唔到起身!
佢一緊張情況差得更甚, 我抱起佢安撫後慢慢细心檢查, 睇睇係咪膝關節挫位未能歸位, 令佢企唔到起身!
嘗試用手推拉關節, 但無發覺關節有移位未能復位, 放佢落地睇睇, 佢又好似上次咁想咬隻後腳位, 今次我果斷咁即時比佢坐骨神經痛嘅順勢療劑; 果然密集3次滴藥後, 一切緩和落嚟, 我抱佢放喺我身邊, 波波可以乖乖咁瞓低!
照咁睇, 波波上次唔係因為膝關節移位未能復位, 係真實有神経痛嘅問題, 好彩我有順勢療劑, 避免咗引發更嚴重嘅問題!
折騰咗一輪已天光大白, 我個心都未定落嚟, 又見達達神色有異, 根據過往經驗佢有咁嘅表情, 通常都係身體出問題; 即刻幫佢滴藥舒緩, 係救我命嘅順勢療劑, 用藥後休息咗一輪, 佢又可以正常閙人巴巴閉!
唉, 擔心都擔心唔嚟, 要病發都不由我控制, 慶幸係每次見佢神情有異, 都可以及時制止進一步惡化, 亦感恩順勢療劑可以控制!
時刻記住貓媽媽嘅留言, 無所謂最好嘅醫療, 選擇適合自己寶貝嘅更重要, 好嘅生活質素從來勝過生命長短, 要佢哋成日去見醫生衝擊唔會少, 壓力咁大又何必?
我無後悔為佢哋㨂選自然療法呢條路, 行得舒服最重要!
我信任順勢療師, prefer用順勢療法, 總勝過衝急症左驗右驗, 順勢療法呢個名改得好貼切, 係順勢, 唔係逆天!
經歷越多, 睇法越多改變, 生物係會有生老病死, 但願我可以放下執念, 只求過程減少痛苦, 唔要苟延殘喘, 時間要到何必要辛苦咁拖延, 做更多都無可能保証到病情有好轉改變!
自己做內科姑娘已二十年, 見心臟病人亦唔少, 人同狗狗其實都無大分別, 都係用藥控制病情為首要, 用乜嘢藥又有咩緊要, 但求生活得唔辛苦, 去到器官衰竭, 做乜都徒然!
養咗狗狗幾十年, 所見所聞加上親身體驗, 對香港獸醫嘅期望不斷下跌, 當然呢個只係我個人睇法同經歷, 我只表達自己嘅意願, 對大家為自己寶貝做嘅醫療選擇, 非常尊重亦無意見😊!
努力學習活在當下, 同兩隻豬出去行返一轉, 唔想再為擔心明日而錯過今天!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
