達達好乖豬仔, 經過重複動作, 每日放佢入氧氣箱, 佢已習慣咗每日入去吸氧, 依家再無大叫好合作; 調整心態後, 比自己正能量, 變得無咁緊張, 兩隻豬仔都供氧, 時間無規定, 有時短有時長,視乎當時情況; 兩隻豬氧療後都好似精神咗, 希望唔係我嘅錯覺!
波波經過今次大病, 元氣大傷, 體重一吓間跌咗10%, 如果不明原因咁暴瘦, 我真係會好驚, 放任體重暴跌好唔正常, 一諗起惡病質吸收不良先攞命; 不過今次我唔驚, 覺得經此一役體重減輕亦正常, 我會小心著力幫佢調養.
今日幫波波量體重, 已經恢復正常喇👏!
先撇除達達嘅長期病, 目前見到最傷嘅係佢無力嘅後腳, 每次便便轉圈必跌, 又要諗吓點幫; 達達一直都有食補充關節嘅supplement, 但效果唔理想, 想換過一隻!
幫兩隻豬揀選補充品好煩, 除咗要配方天然, 仲要顧及味道同質感, 如果佢哋唔鍾意無可能硬塞, 即使產品有幾正...
突然諗起波波用緊嘅玫瑰果粉, 其實波波食咗係有幫助嘅, 只可惜波波膝關節移位日益嚴重, 關節已向內旋, 結構壞咗食咩都無用, 不過雖然係咁, 我仍有繼續有比波波食用, 要保住佢關節唔好痛啊!
不試白不試, 反正存貨充足, 今晚就比刁蠻公主試用, 達達之前食嘅係水劑, 餵食入口較容易, 只需用針筒; 玫瑰果粉嘛我有啲擔心隻豬女抗拒, 因為隻粉不溶於水, 要混和食物, 如果佢唔接受呢個味道, 連肉都唔食, 件產品點好都係無用!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
