2020年8月30日星期日

不斷循環

兩隻豬仔年紀越大健康情況越反覆, 我就隨住佢哋表現轉換咗N百種心態, 一日前覺得佢哋健康狀態頗穩定, 七上八落嘅心情暫可緩解, 可惜一日之間變化可以好大, 突然情況轉差可以好快; 呢啲咁嘅情境喺呢近半年時間, 不斷循環上演, 心累啊!

曾經有過最壞猜測, 覺得已經差不多時間, 但唔想影響大家心情, 祇可以沖涼時偷偷喊; 但兩隻豬仔好堅強, 配合住我嘅堅持去撐, 努力過渡每一個難關!

今日靜落嚟細想, 其實我咁堅持寸步不離, 為佢哋身體健康諗各種辦法, 究竟啱唔啱? 我係愛佢定係害佢? 好似喺度拼命拉扯時間!
但佢哋仲食得瞓得, 保重身體健康點可能係唔啱?

突然發覺波波對聲音反應好差, 呢種變故話來就來喺毫無預兆下, 佢突然就失去聽覺了嗎? 然後又發覺佢前手開始無咩力, 當後腳用唔到時, 整個身體全仗前手支撐, 最終拖累埋前手, 呢個係正常過程, 但我無能為力, 望住佢呆呆咁我心痛至極😭!

我已經好小心做一切保護, 從小開始, 用吹風機吹毛會幫佢耳仔塞綿花, 怕音量太嘈; 眼仔同關節亦有食supplement作維護, 我真係唔識仲可以點做?
怪唔得聽過呢句說話, 你越在意嘅永遠係最折磨你, 正確到反駁唔到!

一直堅持住各種物理治療, 希望幫到少少啦

之前養過嘅狗狗, 從來未有一隻要受咁多磨難, 點解我最鍚嘅波波豬會咁慘? 點解佢條路咁難行?
佢已經睇唔到行唔到, 手腳都開始無咩力, 仲要佢聽唔到嗎? 點解唔可以留比佢多少空間?
唔怪得呢幾日佢咁不安, 不停咁吠一定要我抱啦, 即使我祇係去一去洗手間, 放低佢好短時間佢都大聲叫喊!

我仲要話佢曳曳, 同佢講媽媽隻手保持住同一姿勢咁長時間, 已經搞到之前嘅膏肓炎復發, 半邊肩背連手臂都好痛喇!
原來佢突然跌咗入無底黑洞, 無光無影寂靜到好似隔絕世界, 佢行唔到出嚟只可以大聲嗌; 遇到突然聽覺失靈, 我諗佢一定好驚啦!

其實達達聽覺都好差, 應該已經聽唔到, 暫時優勝過波波係佢仲可以行, 仲有一隻眼; 不過全靠一邊視力, 遲早都係盲, 祇希望可以盡量拖延惡化嘅時間!

好內疚好心痛我無體諒波波嘅困難, 仲話佢曳叫佢唔好不停吠, 可憐佢又唔識講人話, 都唔知要點表達.....
點解我咁大意無好好去觀察😥?

依家佢衹剩餘感官同嗅覺吧, 聽覺係差又好似未完全聾晒, 一時有反應一時又全無啦; 不過佢又變咗時刻要我抱住, 可能僅餘嘅安全感都已無晒; 如果抱住可以令佢安心, 我就算手點痛都挺住啦!

見到乖仔要受咁多苦, 開始懷疑生存係為什麽? 人生是否一定要經歷坎坷不平嘅路?
生存同生活嘅區別令我好迷茫, 每日望住波波都有好真實好強烈嘅不安, 如果代入我自己, 咁嘅生活我一定唔想再拖!

但...理論同真實仍係唔同啊, 非常矛盾, 一想到如果有日佢真係要離開, 我一定會崩潰, 波波係我最珍寶嘅摯愛啊…
心情唔好時真係唔想開口講話, 幸好仲有呢個blog, 可以比我將負能量釋放; 然後, 我會咬住牙鼓起勇氣, 做兩隻豬仔最堅強嘅支柱, 深呼吸挺住陪兩隻豬仔上戰場!