波波肚痾, 每次都選星期日家中只有我一個, 不停激發我嘅小宇宙, 仔呀仔我投降囉!
波波自從後腳膝關節差咗, 關節已向內旋, 已經用唔到後腳, 佢要poo poo時對佢對我都難咗!
因為佢難支配後盤發力, 每次poo poo時都會低聲咁叫, 我難過又無奈; 但還幸佢無因為呢個缺憾影響到佢唔肯痾, 仍每日都有正常便便, 我好感恩囉!
而我同佢一樣比以前辛苦好多, 因為我要用手支撐住佢後腳等佢轉圈, 我嘅姿勢又要就住對佢無阻礙, 每次都扭曲身體, 我諗我遲早都腰膝勞損, 但無可奈何, 無人幫到我!
正常解決已經比之前困難咗, 遇到佢肚仔唔舒服又肚痾, 可以想像我有幾狼狽啊!
我要用一隻手hold住波波, 佢自己企唔到係好大障礙, 我祇餘一隻手幫佢清潔, 佢毛毛又長.....
唉! 唔再形容嗰個慘狀!
呢個仔又特別驚青, 佢應該都sense到有唔妥, 或者有肚仔痛吧, 仲要大聲慘叫, 真係攞我命!
一方面要安撫叫佢唔使驚, 一方面要同佢清洗乾淨, 然後再清理案發現場!
但我好自豪咁講, 我無絲毫不耐煩, 喺波波需要時我可以第一時間去幫忙, 令佢平靜落嚟壓下不安, 我呢個媽媽喺呢一刻總算合格囉！
最初養毛孩真係樂趣好多, 小小一隻彈彈跳好似個波, 但真係要諗清楚佢哋係一個真實嘅生命, 唔係stuffed toys, 會有生老病死嘅過程, 要肯付出時間金錢, 精神體力, 最重要係愛啊！
希望唔會再聽到有棄養嘅 case, 尤其係當毛孩已經年老有病嘅階段, 棄養等同將佢送死, 身心都太大傷害!
我唔敢講我嘅豬仔生活有幾豐足, 但無論生老病死, 我都會對佢哋不離不棄, 肯定付出我所有嘅愛!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
