但停咗氧氣補給, 幾個鐘佢就會扭計, 不停嚶嚶叫表現煩躁不安, 我要抱住不停行來行去安撫佢呢個狀況!
 |
| 吸住氧氣脷仔顏色已經好好多 |
老公叫我隨遇而安, 因應波波情況供氧, 如果佢有需要時點解要佢辛苦? 租用氧氣原意係比佢幫忙還是只求心安?
當然做每件事要考慮後果, 唔好愛變為害, 波波已經氣管收窄唔會復原, 明顯影響佢呼吸情況, 氧氣濃度不足會影響佢細胞代謝同肺活量, 都見到佢脷仔變灰叫我唔好太執著!
留心住箱內濕度溫度, 唔好令到氣管太乾有損傷, 總之一切以波波舒服行先, 視乎佢需要供氧!
老公話個仔年紀大喇, 器官老化係必然現象, 唔好有不必要期望同幻想, 無法回到從前嘅健康狀況, 只能夠盡力去幫！
總之維持到佢食得瞓得痾得, 精神唔錯呼吸正常, 其他唔好多想!
佢講嘅我都明白, 有咁多年養毛孩經驗咪當我傻, 自己心態亦調整過, 無以前咁"死牛一邊頸囉"; 食嘅已經無好嚴格規限, 總之佢哋肯食嘅盡量安排, 肯食為至上; 我唔想再有後悔當佢哋仲肯食時多多節制, 換來佢哋無晒胃口, 祇為偷少少時間生存喺世上!
老公話我換湯唔換藥, 其實食物同供氧原理一樣, 都係波波嘅需求為首要考量; 毛孩年老同年輕做法當然唔一樣, 亦無一條不變嘅程式去依循, 祇可邊學邊做無十全十美咁理想!
無需過於擔心自己有做錯, 唔好比自己壓力太多, 每個人都曾經失敗過, 無得預計成功結果!
聽老公咁講, 從第三者口中聽到呢種分析, 我突然眼淚盈眶; 養呢幾隻豬仔嘅心路歷程真係一言難盡講, 感受到時間彈指即逝, 一下間兩隻豬仔變老咗, 好難過!
 |
| 一開始好乖坐定定 |
達達豬嘛, 唔講咁多啦, 都有比佢入箱聞氧, 但佢就唔肯坐得耐, 差不多十幾分鐘就會大聲叫喊要釋放!
呢個係好現像, 証明佢未有需要氧氣幫忙, 但佢有心雜音同肺壓高, 都需要氧氣保養, 就由佢自己選擇吸幾耐, 我上限比佢廿分鐘, 不過佢每次未到指定時間, 已經急不及待要離開!
 |
| 無耐性被困住要出來喇 |
達達一直用順勢療法, 全無用西藥, 效果算理想, 最明顯係改善到腦退化情況, 恢復到差不多正常; 依家無不停轉圈, 無夜晚大叫, 但行到路嘅盡頭都未識轉彎, 仍然係企定發呆, 但比起以前已經好太多了; 佢仲sense到老公放工時間, 明明瞓緊都好似有鬧鐘叫醒, 會彈起身望住門口好專心等待, 一直到老公返來!
點解呢排感受特別多😅, 腦中突然浮起呢個句子, "即使生命如塵, 仍願歲月如歌!"
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
