用咗幾日張環保尿片, 做返個Feedback, 今次呢個post希望幫到行動不便嘅狗狗, 解決到日常嘅需要!
一隻產品好唔好用, 真係唔可以一概而論, 要視乎你要點用, 你當時嘅需要!
今次呢張尿片, 測試結果, 如果比波波用於氧氣箱內係廢料, 因為佢對我嘅要求唔達標!
我選用呢隻尿片, 係希望佢吸水快及面料易乾, 但測試後我嘅希望落空了!
呢隻環保尿片同紙尿片相比, 索水較快, 但都係需要時間比最上層面料還原乾爽, 其實係正常需要; 波波困於氧氣箱內, 唔係一個通風環境, VV完亦唔會即時挪開身體, 仍然瞓喺上面, 濕身真係難免, 所以呢個結果我可以預料(其實產品說明都有講, 剛剛尿尿表面都會濕, 吸尿後會慢慢變乾, 並無欺騙)!
但我仍會再買呢個尿片, 因為佢亦有我要嘅優點！
我會買大size打算放喺圍欄內, 因為正常狗狗尿尿完會離開, 尿片就咁放室內, 依家長開住冷氣, 有足夠時間吹乾, 好快已經好乾爽; 因為吸收快亦無回滲問題, 腳仔踏上去好乾淨, 我個人覺得呢點優勝過紙尿片!
而我最鍾意係佢嘅面料, 有少少粗糙紋理, 達達轉圈時應該唔會跣, 希望減低緩衝力佢唔跌!
現有呢張放波波帳蓬床內, 萬一佢尿咗會叫我, 咁幫佢換換方向, 有冷氣吹住都快乾, 只要比佢通風唔好坐喺上面, 都唔錯!
但波波晚上瞓覺時尿尿濕身嘅問題仍未解決啊....
突然靈光一閃, 記起幾年前買嘅3D床墊, 佢嘅構做完全符合我今次嘅需要！
大家睇圖就一目了然, 圖片見到中空嘅網孔, 一接觸到尿尿九秒九就穿透, 當然下面要再加墊尿片; 因為我最需要解決嘅係唔要波波一晚罨住濕身, 呢點最重要; 試咗兩晚3D墊, 難題又解決了!
波波真係無濕身, 當然每朝早仍要用熱毛巾酵素抹身, 呢個後續動作一定唔可以少!
另外一個優點, 因為佢係六面透氣中空立體設計, 支撐點特多, 彈性良好, 對護脊椎關節有一定幫助, 而且疏氣, 唔會焗住皮膚係另一個賣點!
 |
| 無開氧氣佢都要入去箱瞓, 有安全感 |
呢個床墊, 當年買來放落網床比兩隻豬用, 就係因為透氣又支撐好, 但結果我無用到!
因為兩隻豬仔嘅腳甲, 都試過插咗落面層嘅網孔, 佢哋抽唔返出嚟拼命拉扯喺度大叫, 嚇到我鼻哥窿都無肉, 以後都唔敢再用!
一件產品好唔好用, 真係好難就咁評論, 全在乎當時點用, 以前我覺得唔好, 今次就覺得極有用!
因為之前買嘅係大size, 放入氧氣箱好論盡, 即刻再訂幾塊合用嘅size, 可以有得替換, 尿咗即拎去沖一沖, 配合埋ECO Pet Fresh , 就可去味殺菌清潔消毒👍!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
