琴日同波波去睇咗醫生, Dr Fan評估都係天氣轉變引起嘅肌肉關節痛, 天氣轉變狗狗較容易發病, 凍定咗反而無問題啦; 近來係多咗呢類痛症嘅case, 天氣問題引發嘅疼痛真係無得避, 檢查過無其他大問題就安心喇!
有同Dr Fan提起波波月初疑似抽筋問題, 但佢聽我嘅形容話應該唔係, 都有可能天氣凍咗佢突然手腳麻痺之類, 但應該就唔係個腦影響嗰類抽筋!
當然叫我小心監察啦, 只靠我口講又點可以確診, 但琴日聽過心肺就好清無問題!
我再請教豆b嘅問題, 今次聽完我描述, 佢就話好有可能係心仔問題喇, 因為激動後步履不穩係明顯徵兆, 呢種情況要做心臟超聲波確診, 目前就多D留心!
反正豆b用緊順勢治療, 又無再病發, 毛質變好間接話比我知療劑係用啱, 咁我就唔想節外生枝喇; 除非佢再有發病, 咁再作打算啦, 一於見招拆招睇住情況搵辦法, 要學識唔比自己壓力加大!
天氣轉涼, 醫生有提過呢個交替時間狗狗特別容易病, 特別係年幼同年長一般都抵抗力較差; 3隻豬都9歲喇, 已步入長者階段, 要更小心照顧喇!
今日開始比佢哋補充vit c, 尤其呢兩日都聽到兩個女都有一兩聲乞嚏!
vit c係一種強力抗氧化劑, 對好多方面健康都有幫助, 是以之前波波發燒, Dr Hsiang就叫我餵vit c比佢, 而上次波波肌肉痛, V都有提醒我餵vit c啊!vit c嘅功用幫助排毒, 維持免疫系統, 幫助製造腎上腺素去應付危機, 幫助眼嘅晶體保持透明, 防止青光眼同白內障, 亦幫助大腦神經系統, 控制肌肉, 對肝, 肺臟都有裨益!
雖然vit c好處多籮籮, 亦係水溶性講話唔怕食多咗, 但我自己就唔會食咁多, 都係補充適量就好囉; 例如嗰排食得生果多, 咁就唔需要啦, 有傷風鼻塞就補充多D, 要自己衡量過!
至於狗狗嘛, 狗狗係會自己合成vit c, 理論上係無必要補給, 而且過量提供仲會做成身體更大嘅影響, 例如尿液酸化, 造成尿路結石嘅問題!
但缺乏vit c嘛, 又會造成牙齒黏膜出問題, 皮膚毛細管道破裂, 濕疹骨骼組織都要注意, 總之要拿捏得宜啦!
之前有同V商討過, 3隻豬每日用50-100mg係安全份量, 我都係比少量好喇, 最驚好心做壞事比多咗嘛, 除非有症狀先會增加到正常份量, 直到天氣穩定就停止喇 :)
我係用呢隻沖劑, 淡淡蔬果味, 我同3隻豬都接受呢個味道; 呢隻係寫住Naturally Buffered, 因為Buffered咗嘅維他命C係中和咗過多嘅酸性, 對胃部較好, 狗狗亦較合用, 大家選擇vit c餵狗狗時可以考慮吓!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
