2015快樂聖誕!

相片連結

忙忙碌碌又跑到2015年嘅尾聲喇, 琴日接到agent通知, 話工人姐姐已經批咗, 但碰啱假期太多, 都要等多半個月, 無所謂啦, 我已經習慣!
講真聽到呢個消息, 我反而開始感覺有D壓力, 實在比D姐姐嚇怕咗, 有D擔心囉!
不過, 唔應該有負面諗法, 要向好處去想....希望新姐姐會係幫到我 :)

 
今日同3隻豬浸浴沖涼, 近來真係做少咗, 洗剪吹一手包辦我係習慣, 但攪完佢哋仲要清洗地方, 呢吓最攞命, 好辛苦呀! 
呢個時間係最盼望有姐姐幫忙, 姐姐到咗就輕鬆好多, 要正面去想, 正能量 :)

琴日冬至, 同老公阿女出去食飯, 其實3個人可以好簡單, 不過我懶得自己攪; 從來都唔鍾意入廚煮兩餐, 但有工人姐姐我會的起心肝用心去教, 煮家常小菜其實唔難, 從細耳濡目染睇住媽媽煮嘛; 諗起以前我媽可以隨時煮一圍菜餚, 真係頂呱呱啊, 可惜我遺存唔到呢D本事, 好多菜式隨住媽媽嘅離開失傳喇!

今年阿女又買咗靚靚cupcake比我過聖誕, 無添加嘅成份我會比3隻豬食少少啦, 皆大歡喜一齊過快樂聖誕! 

呢段無工人嘅時間, 盡量唔加重自己負擔, 又搬又拆做佈景影主題相就免喇; 都係同3隻豬仔出去影吓, 免咗麻煩; 不過出去就難免遇到多人, 鬧哄哄又要加入影埋一份, 波波呢個緊張豬仔又掛住鬧人,  反晒白眼, 好麻煩!

麻麻煩煩, 吵吵鬧鬧都係一種情趣,  總勝過清清冷冷!
我同3隻豬仔預祝大家2015快樂聖誕!
We wish you a Merry Christmas and A Happy New Year!!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！