 |
| 相片連結 |
天氣越嚟越凍, 唔敢帶3隻隻豬出街, 留佢哋自己喺屋企玩!
雖然對孖B時有爭執會打吓交, 但又會一齊玩, 我依家已經習慣; 見佢哋互相兇對方時我會觀察, 盡量唔介入, 咁反而是旦一方會撇頭躲避, 仲無咁煩; 當然見勢色唔對, 就會將佢哋分隔, 唔想又整傷眼仔呢類意外, 再添上麻煩!
所以佢哋自己玩, 我一樣唔得閒, 要睇實晒!
自己有時間就上網搜尋吓, 睇睇有咩保暖用品, 比3隻寶貝豬啦!
我一直都著重室溫保暖, 應該對佢哋作用更大, 吸入冷空氣刺激到氣管就麻煩, 但對於一D外用嘅保暖用品, 幫助佢哋保持體溫, 都仍然有興趣嘛; 女人- 對於shopping點會無興趣, 只係唔同階段對唔同物品關注有唔同啦!
今次搵到件速暖背心, 介紹話係使用含碳物料, 加上自身體溫, 著起後10秒內就有溫暖感, 咁好啱隻怕凍豬豆!
即刻速訂咗返來試吓, 先比達達試吓佢肯唔肯著, 適合就買多件啦; 天氣開始冷, 達達嘅脫毛症又再循環, 明顯見到佢疏落咗嘅毛髮, 都有必要比佢著番件保暖嘅衫!
達達著起好啱身, 咁我即刻再訂喇, 可惜店家現貨已經賣晒, 要等下次貨返!
又同Mi傾吓, 佢就好似我個八寶箱, 咩都可以搵到咁㗎 :)
不過著得耐咗, 就越發覺達達有D唔習慣, 可能關係物料比較硬, 佢著住瞓覺時, 轉側好似有D困難.
於是幫佢除咗, 再比豆b著呢件衫, 豆b就無達達咁慘, 著得全無壓力, 見佢成晚著住, 都瞓得好好啊!
波波就唔使諗喇, 要佢著衫好慘, 算喇!
另外買咗兩包潔牙紙, 方便佢哋食完3餐即時抹吓, 試過都幾好用啦; 當然同刷牙係兩回事, 但對孖B都唔抗拒, 咁簡單抹抹又唔難, 就做吓啦!
達達呢, 就可以慳返, 一來呢個刁蠻公主唔會比我掂佢個口仔, 二來佢都無咩牙喇 :(
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
