豆b氣管情況算控制住喇, 仍然繼續聞氣加順勢療劑, 希望一路好轉啦, 呢隻豬要密密監察, 有唔妥就要見醫生啦; 今日得悉狗友嘅松松肺炎入咗院, 天氣轉變令松松氣管心肺等變差, 真係好怕天氣變化!
達達今日都少咗乞嚏, 波波氣管間中都有D "ka ka"聲啦, 兩隻豬都要一齊聞氣加順勢療法喇!
 |
| 今日唔使張大口吸氣, 條氣順返喇! |
3隻豬食開嘅脫水菜糧突然斷咗貨, 攪到我好麻煩, 買咗另一隻牌子, D豬仔唔鍾意呀; 其實之前都有買過呢個牌子, 但大都係加落原有嘅菜糧度, 因為用嘅料唔一樣, 想有多D變化, 一直都無問題啦; 但今次單食呢款菜糧, D豬就唔係咁肯食喇, 係咁聞吓就行開, 初時嚇死我啦, 以為身體又唔舒服喇!
還好用手餵都肯食曬, 精神又唔差, 先慢慢意會係菜糧變化出咗問題, 呢3隻豬咁揀飲擇食好麻煩呀!
唯有加D新鮮菜又加D麥片, 將味道溝吓, 咁佢哋就肯食番; 已經週身唔得閒, 每日仲要加添額外工序, 用更多時間, 真慘!
諗起A嘅狗狗都有食相同牌子嘅菜糧, 問問有無存貨打救吓, 佢話無額外存貨喇, 但用緊有一包, 食咗少少啦!
佢話佢狗狗無我D豬咁嘴刁咁煩, 可以食其他, 可以將包菜糧比我頂住吓!
真係多謝好朋友相助, 放工仲要拎過來近我嘅地鐵站, 又幫忙買潔齒水healthy mouth, 減免我好多麻煩!
因為養呢3隻豬, 認識到咁多好朋友, 當D豬健康出問題, 我又徬徨又騰晒, 理智都無埋, 感謝有好朋友陪伴我, 帶豬仔見醫生壯膽; 又有好友幫忙從國外訂藥物, 更可以幫忙網上shopping購物, 事無大小都肯出手相助, 真係多謝晒!
怪唔得話人生有一知己已無憾, 我有一班豬朋狗友, 都係上天恩賜嘅福份啊!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
