 |
| 相片連結 |
心情極差, 經過一晚調整思緒, 算係安定落嚟, 但仍然係唔想面對!
琴日帶豆b去見葉醫生, 比咗豆b驗血報告同XRay佢睇, 佢話無胃口食嘢一定有事, 要搵出原因先可以幫到佢!
佢建議做超音波掃描, 會睇得較全面, 我帶得豆b去求診, 只要係非入侵性嘅檢查, 我一定同意!
豆b真係好乖, 我同佢講要乖乖合作, 醫生係幫你!
佢任由護士捉住, 無掙扎好合作瞓低, 我一邊幫佢按摩住頭仔, 佢眼仔碌碌咁望住我, 極配合超合作, 見佢咁懂事, 我眼眶即刻含滿眼淚!
葉醫生照得非常仔細, 我見佢神情咁嚴肅已經知有大問題, 當佢指住屏幕解釋時我個心直跌谷底!
豆b有腹水, 肝腎都見到有問題, 但葉醫生認為肝嘅問題更大, 因為見到豆b嘅肝有萎縮變細, 而變細嘅原因應該係肝硬化, 所以令佢出現貧血等問題; 一邊腎都有不正常現象, 最後驗埋小便, 豆b有蛋白尿, 尿比重亦低, 報告直指出肝腎功能都慢慢咁衰退喇!
一直有幫3隻豬每年驗血, 即使今次驗血報告都無見到肝嘅指數有問題, 一下間話我知佢肝功能已變得咁差, 我點接受呀?
葉醫生話驗血係睇唔到肝呢種變化, 當然仲解釋得好詳細, 但當時嘅我點聽得入腦吖, 祇聽到佢話動物年紀大, 離開嘅原因都不外乎係器官衰竭及腫瘤啦; 但豆b見唔到腫瘤, 已經係萬幸喇!
器官壞咗係無得逆轉喇, 希望餘下嘅細胞無急速變差啦; 佢話無人可估計豆b剩餘嘅時間, 佢話呢種情況西藥幫助唔大, 同意我尋求另類療法!
一下間好似見到佢哋將會一個跟一個咁離開我喇, 9歲半年紀唔算老大, 雖然明白生老病死係自然現象, 但來得似乎太快, 我個心裂開晒!
多謝Mi嘅開解, 琴晚同佢傾過後感覺好好多喇, 佢send咗一D資料, 原來有氣管下塌嘅狗狗, 有細過半數嘅比例都係肝差, 豆b衹係不幸咁佔咗一席位置啦!
http://www.ncbi.nlm.nih.gov/pubmed/16955807
先天氣管嘅情況都無得幫, 之前亦唔識留意呢樣嘛, 就連醫生都從來無講, 我點識咁多吖!
Mi話都唔使咁绝望, 再搵順勢療法去幫手啦!
佢將豆b情況詳細電郵澳洲醫生, 睇有咩療劑可以幫到忙, 我唔會放過任何希望!
順勢嘅醫生亦好快回覆咗,亦建議咗幾隻療劑, 令我有返小小希望喇; 我都唔敢強求甚麼, 但求豆b唔會活得難過就好喇!
雖然極心痛難受, 但我一定會盡最大能力去支持豆b, 積極面對所有唔預知嘅難題!
豆b嘅腹水係導致佢厭食嘅原因, 還幸祇係小量, 醫生話希望情況會轉好, 咁可以自己吸收返, 唔使抽腹水咁驚啦!
無論點冷靜, 點明白呢個情況, 都難免情緒低落, 多謝Ka嘅鼓勵, 亦多謝朋友嘅關心, 今次出呢個post, 唔想一次一次去答去講喇, 每講一次都心如刀割!
天氣唔錯, 同3隻豬出去行吓,希望可以釋放一D負能量啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
