每日都忙於幫3隻豬仔身體做保養, 每個保養治療都要坐喺身邊陪住, 都花好多時間喺呢個課題上; 保養每隻豬仔最少都要每日早晚做一次, 如果碰啱邊隻豬仔有病, 就好似依家豆b身體出事, 要特別照顧多D, 再碰啱之前波波脊椎疼痛, 達達又猛打乞嚏, 更忙到失晒方向!
 |
| 鼻仔濕濕嘅達達豬 |
真係好希望可以輕輕鬆鬆咁就可以做到保養, 就如之前買咗遠紅外線氈一樣, 我覺得真係好爽, 呢個係唔使我花時間陪伴嘅保養, 祇係墊喺床上, 比佢哋瞓喺上面就有療效, 真係好方便, 仲有係戴磁石頸帶, 又係方便妥當!
一直都有留意仲有咩好方法比3隻豬仔做保養, 最好就如同遠紅外線氈一樣, 省時省力但又效果顯彰啦!
又真係睇到有新嘅科技應用喺寵物身上, 呢個新產品係微能量寵物頸鏈(其實重點係個鏈墜, 頸帶可以自己隨意選配), 我之前都有聽過比人用嘅能量鏈, 但專為寵物而做就好新鮮囉 ;)
依家D毛寶貝都真係巴閉喔, 以前連寵物衫仔都選擇唔多, 依家呢, 有晒名店囉 :)
得知有呢個新產品都係因為Mi, 事緣佢買咗新版本嘅無痛針灸筆, 佢話新版本效果顯著好多, 佢自己一向有頸痛, 佢話用呢枝新筆照射好短時間, 就舒緩咗!
呢個好朋友有好嘢總唔會忘記我, 第一時間就比料我; 其實用針灸筆我唔係初哥, 一向都有用iwand, 不過我對療效一向都係感覺遲頓....無感覺!
反而睇資料時, 比我睇到微能量寵物頸鏈, 我比較有興趣喎!
睇咗簡單資料, 介紹話呢個微能量寵物鏈, 可以促進血液循環, 提高自愈能力, 加快新陳代謝同提升免疫力等等嘅強項; 利用小小一個鏈墜, 可以疏通經絡, 活化氣場能量!!
豆b依家嘅情況, 可以做得嘅我都想盡做; 仲有波波, 都驗到有輕微尿蛋白, 希望佢仲未有實質徵狀未惡化, 可以盡早幫到忙!
唔使舟車勞頓, 亦唔使花特別時間, 只係將個鏈墜配戴上頸項, 就可以無時無刻幫到佢強化身體健康!
link: 能量鏈FB
呢類新科技都唔算係天荒夜談, 外國有各類光波、能量治療都唔算短時間, 只係自己無需要時就唔會研究啦; 雖然我係對各樣治療都係反應遲鈍, 但我唔會質疑我唔認識嘅產品; 反正世界之大有無限可能, 既然獸醫講咗西藥對豆b幫助唔大, 除咗用順勢療法, 我梗係希望仲搵到有其他好辦法啦.
用呢種新科技產品又唔會令佢哋辛苦, 亦無不良副作用, 就不妨試吓!
 |
| 多謝Mi介紹用呢款頸帶, 好輕, 長戴都舒服! |
一講起我想買鏈墜, Mi又有興趣喇, 又話要買比佢嘅寶貝狗狗戴, 咁我哋就一齊買啦 :)
達達無迫切問題要借助微能量鏈墜, 就先買比對twins配戴, 希望幫到佢哋提高自癒能力, 推動到佢哋身體有改善空間!
近來用錢好似倒水咁, 又要買新配方嘅藥比豆b喇, 唔怪得話醫療費用嘅開銷最為龐大, 健康係財富真係無花無假, 大家要多多保重喇; 可惜年紀大機器壞, 如果有對健康有利嘅產品, 點都要借助吓喇!
希望波b、豆b戴咗微能量鏈, 健康有明顯改善啦!
link: 能量鏈經銷店
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
