 |
原來3個正常咁自己肯食都唔係必然嘅 相片連結 |
黑仔到咁, 我真係唔想寫, 自己都無眼睇!
達達前晚瞓到半夜3點幾, 好似發癲咁喺床度走來走去, 好不安咁大聲尖叫, 然後見佢猛磨尿尿嗰位!
瞓到矇矇矓矓間, 一見佢咁即刻嚇到醒晒!
即刻彈起身將佢抱起, 但無論點安撫, 都無濟於事; 佢磨完下身又挍耳仔, 仲將個面擦來擦去; 呢個情況應該係敏感, 但餵咗敏感藥, 都係幫唔到佢!
將佢呢個情況用手機拍低, 諗住天光就帶佢比醫生睇睇!
見到佢磨到皮膚都紅晒, 唯有嘗試搽herbal cream, 噴magic mist, 再照iwand啦!
好好彩攪咗一輪佢安定咗, 攪咗咁耐佢可能都攰, 終於肯瞓覺!
還好休息咗一晚, 第二日好似好返晒, 咁決定再觀察; 反正星期五葉醫生放假, 約Dr Hsiang即日睇症一定無期, 如果堅持要睇自己睇開嘅醫生, 其實好睇當日嘅運氣!
到咗今日, 一整日都風平浪靜, 我就專心去諗豆b嘅菜單啦; 傳心師同豆b傾完話我知, 豆b嫌依家嘅食物無味, 佢唔鍾意; 咁樣樣都用水煮又難怪, 3隻豬口刁慣; 不過傳心師同佢講咗身體有唔舒服, 要配合先乖; 豆b有答應盡量配合, 如果我整得好味D!
佢話唔要打糊又唔要將食物撈埋, D味道好怪喎!
你估我好鍾意打糊餐餐用針筒餵咩, 大小姐你肯食就最好啦!
到咗晚餐, 我就試試, 將菜炒香切碎放一邊, 唔撈埋落D蛋喇; 早、午餐時比淨蛋佢係好鍾意嘅, 點知呢....
佢行埋去見到有菜, 即刻走咗去, 連蛋都唔食, 挑出嚟食都懶 :(
豆b好堅持, 一直都唔肯食其他嘢, 任我將番薯焗到好香比佢, 佢都走咗去!
咁點呢, 夜D就唯有比少少羊奶啦, 好怕佢食得少無力行; 呢隻衰豬, 飲到嗒嗒聲, 我真係比佢玩死啦!
 |
| 真係扭計, 點攪呀？ |
波波縮起咗前手, 好驚咁硬晒呔, 唉, 又嚟!!!
呢輪淨係focus喺佢哋個腎仔, 呢兩日又加埋達達咁攪一攪, 個腦已經爆; 其實都有諗過筋骨嘅問題, 但一時間又唔想食咁多不同療劑嘛, 點知咁就出問題!!!
呢個病已經發咗出嚟, 根據過去嘅經驗, 單靠順勢療法係幫助唔大, 還好之前Dr. Fan有配好備用藥比我, 即刻餵波波啦, 跟住照燈, 又攪一餐!
黑仔到唔想講, 今年又唔係犯太歲, 攪邊科呀?????
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
