我當然知道利用水嘅浮力, 幫助波波後腳復健有好處, 無奈波波極畏水, 以前著住浮水衣放佢落水, 佢都驚到亂打亂撞, 成件浮水衣都扯咗去!
依家有視障, 我諗都無諗過再放佢落水, 都肯定佢會好驚, 無可能幫到佢; 但R哥哥話水中鍛鍊真係幫助好大, 叫我唔好比佢游水, 水越深浮力越大, 佢一定抗拒; 哥哥建議水中步行, 即係脚仔貼地, 唔會載浮載沉感覺失重心, 可以試試; 叫我先將水位放到膝蓋位置, 已經有浮力保護到關節, 等佢適應後再增加水深, target都祇係放水嘅深度浸到肚仔, 已經做到功能所需!
今日照R哥哥指示, 放水落浴缸試試, 無感覺佢好驚, 但唔行, OK, 企都可以, 祇要佢唔好坐低, 都幫到DD😌!
但呢個仔, 一如我所料, 越企越衰, 企到弓背彎腰, 姿勢變異; 我不停鼓勵, 引導佢向前行, 都快要失聲, 佢竟然坐低....
雖然好氣餒, 但我唔會放棄, 聽日再接再厲, 但願佢慢慢習慣會肯嘗試!
比佢休息足夠, 又再練習重心向後移, 復健真係一條漫漫長路, 但我深信多加練習會幫到佢!
可以食得瞓得, 行得痾得, 呢種平凡嘅生活, 原來都係一種難得嘅幸運😣!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
