 |
| 相片連結 |
「有心唔怕遲, 十月都係拜年時」, 今日係年初六, 都仲係新正頭, 兩隻豬仔要同大家拜年, 祝大家身體健康, 呢個祝福太重要, 一定要行先😉!
祝豬年大吉, 心想事成, '豬'事順利, 福星高照 !
兩隻豬仔呢幾日都平安大吉, 希望今年都豬事順利, 不過年三十晚阿女發燒, 預先book咗檯食團年飯, 最終都要取消; 呢個狗年臨尾都麻麻煩煩, 已踏入咗豬年, 希望D麻煩事隨住狗年灰飛煙滅!
早幾日工人姐姐放年假, 我掌舵打理家居瑣事, 都幾忙㗎; 幾日假期達達都好乖, 見我騰來騰去, 佢好安靜自己坐下行吓, 我同佢洗眼仔梳毛都無鬧, 少有咁順攤, 咁反常合作我好驚呀; 見佢有咁嘅表現我唔敢鬆懈, 無論做乜都帶住對射哩眼, 好幸運佢又乖乖咁自己食餐, 比零食都賞面, 無驚無險直到瞓覺時間!
自己都覺得搞笑, 隻刁蠻公主表現乖巧都驚一餐, 我真係寧願比佢閙, 有咁反常舉動我唔習慣!
呢個農曆年天氣反常又濕又熱, 我第一次要開冷氣過年, 咁落去往後仲有無冬天? 全球暖化唔係講笑😟!
天氣咁熱同波波試下做水中鍛鍊, 利用水嘅浮力幫助佢活動吓膝關節, 但呢個仔極畏水, 以前落水都驚到大叫, 依家睇唔到就坐咗喺度唔肯郁, 我都預咗佢會有咁嘅表現; 唔敢嚇怕佢, 由得佢浸浴享受吓微泡按摩就算!
 |
| 據說浸5分鐘微泡浴等於1小時的按摩 |
今日又帶波波見R哥哥, 做第二次物理治療, 呢幾日再忙我都無偷懶, 聽從哥哥嘅指示適量幫波波做按摩, 不過波波唔太鍾意, 只可以做好短時間!
今日如常做激光治療, 再做拉展, R哥哥做嘅同P姐姐係有分別, 波波比較接受呢套, 好合作無猛咁典, 哥哥仲讚波波好乖好定添😄, 真係無得話邊個好, 夾到係最緊要!
今次哥哥再教咗我做個簡單嘅動作, 幫波波強化後腿肌肉, 等有進步時, 難度就慢慢加添!
希望做完 6次療程會見到有進步, 依家真係行得差, 原來退化可以咁突然, 一下間咁大改變😖!
好懷念波波跑馬步嘅英姿, 好似跑馬咁彈吓彈吓已經無得再見!
啊, 今日係診所見到導盲犬google呀, 自從上星期睇咗'星期日檔案', 我一見伯伯就認出呢隻乖乖導盲犬, 以後都應該會再見面, 佢嘅療程剛排喺波波之前😊; 導盲犬性格真係溫純, 波波感受到正能量, 表情好自然, 之前碰見隻哥基, 佢一開聲吠, 波波即彈起嘈到拆天😜 !
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
