琴晚波波好似腳痛, 坐低團團轉唔肯企起身, 伴隨住低聲呻吟!
琴日日間仲行得好好, 完全正常好大進步, 到咗夜晚突然惡化, 好似企都企唔到, 我出齊八寶都徒勞; 見佢坐住團團轉表情好燥, 好似想咬後腳但又咬唔到, 仲要突然大叫, 搞到我呢個媽媽騰晒都唔知要點做😓!
Video: 琴日明明算行得幾好😣😲
即刻餵順勢藥先止痛, 再餵冷靜療劑希望舒緩到, 但click唔中😱!
咁耐以來, 一切大小健康問題我都係靠順勢藥, 超出自己認知範圍我會同順勢療師商討, 有需要時會customised藥劑訂造; 其實用啱療劑情況係可以好快控制到, 最大困難係我唔知波波今次問題出喺邊度!
基於近期波波嘅不適都係來自佢腳仔, 試用關節療劑, 但好似幫助全無, 我想去抱起佢檢查佢掙扎大叫, 搞到我如熱鍋上嘅螞蟻好惶恐!
過咗一陣個仔比較安靜落嚟, 無再pat pat 黐住地下轉轉轉, 但都係坐到直直唔肯爬低; 可能鎮靜藥開始生效, 佢肯比我去檢查腳仔, 我先要確定佢反射神經有無出問題; 幸好反佢腳掌仔時, 佢反應好快, 咁我都定咗落嚟!
個心定D時就可以比較有條理解決問題, 去睇吓自己個"藥庫"仲有無適用嘅療劑😝....
然後見到有枝Sciatica Repair, 即刻上順勢網頁睇睇, 眼見有幾項都吻合波波現狀, 就即刻拎去餵個仔!
可能click中, 波波食咗療劑後可以瞓低, 一整晚都好平靜我就無咁閉翳!
不過, 今早又再出現相同問題, 好似後腳無力, 我扶住佢企佢都吊起腳仔, 然後又坐低團團轉鶯鶯叫, 唉, 呢個皇帝仔!
再比佢食相同療劑啦, 幸好都控制到, 之後無異狀再無叫痛喇!
whatsapp咗條片比R哥哥, 叫佢幫我諗吓計, 聽日帶波波去做激光治療, 希望有辦法幫到個仔啦!
然後就拎艾灸盒出嚟, 幫波波艾灸, 佢就好合作好快爬低😊; 呢幾晚又上網爬文, 睇到好多個案都係用艾灸幫到狗狗不至於殘廢; 反正波波好享受, 我亦相信持之以恆會幫個仔腳仔嘅問題, 最好係唔使點花費嘛😜!
Link : 給狗狗艾灸
看看寵物都用艾灸治病了
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
