一個星期過得好快, 又到咗見R哥哥做物理治療時間, 今個星期波波表現好差, 好似無見過佢正常咁行, 明顯偏向用左腳, 但摸佢右腳關節又無叫痛, 唔知佢感覺係點啦; 即使唔知佢係乜狀況, 但右腳唔肯用力就睇到喇!
呢幾日上網爬文, 都有講及膝關節移位問題一定係越嚟越差, 如果去到 3、4級其實除咗手術其他幫助唔大, 但亦強調一點, 狗狗年紀大或健康情況唔許可, 就唔建議麻醉開刀喇; 我一定唔會比波波冒險開刀, 唯有幫到幾多做幾多啦!
波波細細個就知佢有膝關節移位問題, 係松松通病佢應該係天生, 不過當時問題唔嚴重, 獸醫話無需要搞, 咁多年來偶有腳仔痛都好快好返, 到今時今日情況嚴重咗又年紀漸大, 要復原較難, 但咁多年後先轉差其實算唔錯喇!
都係保守治療, 做得嘅盡做, 祇要佢唔痛就好, 比D時間啦!
今日見R哥哥, 詳細同波波檢查, 話佢其實無轉差㗎, 做某D拉扯動作仲話佢反應好咗, 但佢突然又行到趷吓趷吓, 都唔識同佢玩, 今日做完治療返屋企, 佢又行到無事一樣, 到底點呀?
不過R哥哥話佢就住膝關節去行, 連帶髖關節都差, 復健都要一 段時間喇; 無法啦, 都要繼續幫佢啦, 唔痛痛就OK喇!
Video: 今日做完治療行得唔錯㗎!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
