今日傍晚按約定時間, 帶波波到獸醫診所見物理治療師, 心情有D緊張㗎, 一來對係路盲嘅我好大挑戰, 時間上又就唔到叫老公帶路, 唯有頂硬上自己盲摸摸, 為咗呢幾隻豬仔已經有無限個突破; 二來又擔心個仔唔肯接受陌生人嘅幫助, 其實佢失明後好抗拒接觸任何人, 上次做家居復健按摩, 其實都係我做多, 大部份時間P姐姐都係從旁指導我!
講真, 我都信自己唔過, 有無按中穴位? 力度輕重有無做錯? 筋腱位置有偏差就幫唔多啦, 請治療師上門係想有專業復健按摩,個衰豬搞到變咗好似我上課😅!
請P姐姐上門試咗兩次, 個仔都係唔合作, 都唔太願意比姐姐按摩, 勉強做幾分鐘又要停, 佢係咁典到底有幾大幫助? 無可奈何!
今次, 物理治療師係哥哥, 波波會唔會比較合作?
我唔介意花錢花時間帶波波往返診所, 大前題係要有幫助, 如果做成佢更大壓力, 最怕好心做壞事, 我唔想囉!
呢幾日已經不停同波波講, 腳仔要唔痛痛就要合作!
 |
| 先評估, 再做伸展、按摩！ |
終於見到R哥哥, 先檢查波波, 主因都係膝關節移位, 其實都明白呢個問題一定係越來越差, 唯有希望盡做會有幫助!
今次波波好乖仔, R哥哥幫佢做按摩, 伸展運動, 雷射激光治療等等, 佢都好合作, 祇係有D位可能痛, 佢會縮囉; 整體嚟講比上門做好得多, 可能唔係自己地頭波波收歛咗, 唔敢太放肆啊; 不過從開始我都無離開過, R哥哥就叫我戴上護目鏡, 就咁陪足一個鐘一直用聲音安撫住個仔, 佢表現無驚囉!
暫定做6個療程, 睇進展如何, 不過碰啱過年, 下次要等診所放完假先有得做喇😞.
R哥哥都有教我點幫波波做按摩, 同P姐姐又有D唔同, 唉唯有盡力而為, 希望有D幫助啦!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
