時間過得飛快, 一轉眼今日波波14歲喇, 雖然好痛心要面對乖仔咁多身體上嘅殘疾, 但仍好感恩可以陪伴佢過14歲生日, 都唔敢有乜嘢生日願望喇, 但求佢唔好再遇到不幸, 平平靜靜安安穩穩咁過日！
每日都同乖仔講, 媽媽會比佢無限嘅愛, 祇要有愛存在, 就可以排除任何障礙！
今日雖然無咩特別慶祝, 但仍係一個好日子, 就簡單做個南瓜洋菜凍, 呢款凍jelly暫時佢都仲鍾意, 就算無牙仔都OK; 加咗洋菜可以補充多啲纖維, 兩隻豬去poo poo更容易; 多年前我怕洋菜凍會令佢哋痾肚仔, 今日斗轉星移, 我反而希望幫到佢哋嘅便秘, 所有事真係唔可以同日而語!
喺呢個特別日子, 當然無忘記波波嘅孖生姐姐, 同一日生日嘅壽星女豆b, 唔知隻鬼靈精有無喺彩虹橋上開birthday party😄?!
自從豆豆離開後, 波波達達過生日都係意思意思咁整少少簡單食物, 亦再無佈置背景影生日相, 好怕記起3隻豬仔一齊過生日嘅趣事, 唔想比較依家祇剩返兩隻豬!
今日突然好掛住豆b, 做咗一個生日視頻去紀念佢, 我從佢第一次同我哋一齊過嘅4歲生日開始, 一直去到佢最後嘅10歲生日!
豆b係4歲時入住我家, 做咗我6年乖女, 同波波達達一齊過咗7次生日, 今日睇返呢個video, 見到昔日3隻豬仔坐埋一齊, 對我擾擾攘攘搞生日會好好奇, 對影相打扮都唔抗拒, 真係好乖豬!
回望過去, 萬千思緒喺腦中浮起, 永難忘記!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
