今日偶然翻翻阿女facebook, 原來波波離開嗰日佢有出post, 喺無心理準備下見到波波張相, 完全控制唔到自己嘅眼淚; 阿女有好幾位朋友都見過波波, 見到佢哋嘅留言, 感覺溫暖又安慰!
今日係波波離開嘅第16日, 每一日我都希望見到佢返嚟, 可能我太專注留心佢嘅床仔, 佢唔方便現身比我睇; 記得當日見到豆b, 係我無預料下佢發光嘅形象突然飄入我眼底; 人生可能就係咁, 你越想得到嘅, 好多時都事與願違!
有時靜落嚟會諗, 人終究都要走, 但仍要每日經歷住酸甜苦辣, 睇唔透嘅人心, 放唔開嘅牽掛, 越唔過嘅無奈, 追唔返嘅昨日, 人....生存到底係為乜?
唉, 想得太負面, 咁諗係唔對, 波波嘅離開對我打擊好大, 我想法偏離咗正軌....
即使聚散無常, 但人生在世, 都係要好好活啊, 仍希望積極生活, 就算祇得到苦中一點甜, 都唔想活得消極頹廢!
琴日收拾心情, 喺陽光下同達達出去行吓, 但走過嘅每段路記憶中都有波波, 避唔開嘅難過....
達達同Ka講過唔習慣依家剩返佢一個, 決定帶佢去探貓貓, 希望有貓貓陪吓佢會開心返, 多返個朋友仔; 但呢個惡女, 由見到貓貓嗰剎那就開始鬧, 貓貓都祇敢慢慢行近試探, 見佢咁唔友善都轉身行; 呢個女, 一直都祇接受波波同佢玩!
緣份從來都無得解, 亦不由人去安排!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
