今日係波波離開滿一個月, 然後又收到阿女送嘅禮物, 一打開又眼涙直飆; 自從波波離開後, 我最發達嘅係淚腺, 眼淚總係流極都流唔完!
我從來無想過要呢種型態嘅抱枕, 所以豆b走後我無要做嘅打算, 可能阿女想比我多啲安慰, 今次真係好似再同乖仔會面, 感覺激動又心酸!
今次阿女對波波離開, 佢處理我情緒好特別, 以前所有毛寶嘅離別, 佢都係勸我放下自在, 唔好沉迷於悲哀, 做咗所有要做嘅就心安理得, 我哋無須覺得有虧欠; 只要喺我哋身邊時, 佢哋得到最好嘅愛護, 我哋亦從無忽略過佢哋嘅需要, 一直都有好好照料, 一朝要走, 都係好好嘅善別!
但我....其實仲有太多不足, 仲係做得唔好, 有好多遺憾釋放不了!
今次波波離開, 阿女對我所有反應無干涉, 亦無多加勸說, 佢知道波波喺我心中係最特別, 佢感受到我嘅痛唔同之前!
呢段期間, 偶然講起波波, 我雙眼好快會升起霧氣, 控制唔到我都感覺腼腆, 會解釋因為時間尚短, 我會盡快復原....
但阿女竟然會答都無關時間長短, 都要睇感情深淺....
可能佢依家有咗貓貓, 有切實感受, 理性同感性比從前更懂拿捏平衡點!mp4-如果沒有你
佢會送我相關禮物, 比我盡情發洩(但我自問比之前任何一次更收歛); 記得波波未離開前有一個晚上, 阿女晚飯後同我閒話家常, 佢問我養嘅八隻狗狗當中, 邊隻對我最重要? 當下我無細想, 即刻就回答係波波!
依家回想, 當晚見佢聽完我講後若有所思, 點點頭呢個話題略過就完結!
或者, 阿女做reiki時已感覺到波波來日無多, 佢試探我, 睇吓應該點做輔導工作; 不過佢應該見到我真係好努力咁放下, 但仍未可以做到內心全無波瀾起伏, 平靜如湖面!
我都未敢觸碰部份波波遺留嘅物件......
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
