中秋節, 一個象徵團圓嘅日子, 但今年對我來講, 月亮並唔圓; 迎月夜突然到來嘅黑雨, 對我心情刻劃好透徹, 無咗波波嘅中秋, 唔會人月兩團圓！
其實我已經忘記咗過節, 祇見到老公同阿女拎返來一盒盒月餅, 我就左手來右手去, 送晒比鐘點姨姨同工人姐姐, 對邊日係中秋完全唔關心亦無概念, 琴晚阿女突然問我係唔係今晚做節, 我一出口就答做咩節? 忘記了!
無咗波波嘅第十三日, 近兩星期了, 波波從未入我夢亦無返過嚟同我見面, 但我就好肯定佢唔會食言, 佢一定有返嚟只係唔想比我見, 我明白係乖仔照顧我嘅感受, 並唔係我一廂情願, 我哋之間心靈連繫從來都溢於言表, 一直以來, 佢嘅每一個訊息我都唔會錯誤解讀, 佢臨走前都有表示, 祇有媽媽最明白佢意願!
今日, 係十月嘅第一日, 我將月曆翻後一頁, 見到波波個名映入眼簾, 個心如同突然被硬物撞擊, 心痛之餘一下就眼眶紅了....
咁多年來我都習慣喺月曆上記錄佢哋poo poo嘅次數, 用個✔️號喺日曆上好方便, 可以好清楚情況一目了然！
每一年我都會預先喺每個月mark低佢哋個名, 祇係呢兩星期心情低落, 達達嘅記錄我叫工人姐姐✔️, 每次叫姐姐話我知上次係幾時, 無見到乖仔個名, 以致今日突然衝擊我又眼淚流滿面!
即使叫自己要振作, 但面對生離死別, 悲傷仍會不斷重複出現, 即使有時心情稍平復好轉, 亦會不經意喺某種因素牽引下, 再陷入悲傷嘅軌跡不斷迴旋....
 |
| 那年, 中秋佳節, 人月兩圓! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
