估計唔到一個抱枕可以咁大魔力, 每晚抱住波波枕心靈得到好大慰藉, 感覺溫馨又踏實; 不過抱住波波枕會偶有剎那失神, 感覺疑患疑真.....
但呢個抱枕令我每晚都好好瞓(雖然我好夜瞓), 我甚至醒咗都唔想起身, 就咁賴喺床上同達達一齊瞓, 可以瞓完又瞓, 一直瞓...
真係好奇怪, 以前我祇有失眠, 想瞓都唔瞓得, 依家竟然可以日瞓夜瞓隨時瞓, 祇係瞓完都覺得疲乏!
只有瞓著先可以消耗無咗波波嘅空虛時間, 瞓著先可以停止對波波嘅想念, 抱住波波枕瞓可以慢慢撫慰我嘅傷心, 希望瞓飽後我可以再世為人!
早幾日睇咗一個直播, 題目係'失去' , 一個鐘裡面講咗好多, 而最入我心嘅係呢句'lost is life, life is lost'!
其實活到今日, 大家都明白、清楚, 活著每一日都面對失去, 失去摯愛會傷心難過係正常事, 人有七情六慾係正常不過, 就算失去一件心愛嘅物件都會唔開心!
唔同嘅人會有唔同層次處理情感得失, 而每一次失去都有唔同感受, 對我來講今次失去波波, 要更努力調整我嘅傷心!
再次睇返自己之前轉貼嘅呢篇"面對失落", 感受特別深!
2019年排期做3隻豬仔嘅黏土公仔, 店主話手作成品要等兩年半, 我明白手工制作得一雙手, 訂單多當然要輪候; 我偶有上佢網頁睇吓其他制成品, 琴日睇到店主概歎自己狗狗老化速度太快, 快到佢一直在後頭追,不敢想像離別嘅到來....
然後大家舒發寶貝離開嘅感受, 我搭咗句口, 但見到佢回覆我眼又浮起霧氣, 真難受!
離恨恰如春草，更行更遠還生 - 《清平樂》李煜
 |
| 轉貼:facebook 羅乃萱專頁 |
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
