失去波波嘅第廿六日, 每日都覺得好攰, 可能之前神經一直繃緊, 一旦失去張力, 未識處理呢種無焦點嘅放鬆!
呢種攰嘅感覺整日纏擾, 除咗全身骨痛, 好似渾身無力, 連張開眼皮都覺得沉重, 祇想賴喺床上唔郁; 無咗波波, 生活一片空白, 好似行屍酒肉!
我一直知道波波對我好重要, 我亦預計會有一段好長嘅難捱日子, 但我都好努力將傷心放下, 希望喺遠方嘅波波活得釋然; 佢離開咗就應該唔再牽掛媽媽, 要開開心心展開新一頁!
我唔想佢擔心我, 我有努力放下, 祇係知易行難, 失落嘅情緒無一個開關鍵, 唔係話可以隨時關上咁便捷!
 |
| mp4-所愛隔山海 |
失去波波, 空出好多時間, 原來養一隻狗狗, 同養多於一隻狗狗分別好大, 只係咁多年來除咗Bebe, 我一直都係養倍數嘅狗狗, 呢種感覺忘記晒; 養1+1唔係=2咁簡單, 仲要睇每個毛孩性格去調節!
只單一照顧達達唔難, 除咗餵藥同照顧佢三餐, 太多剩餘時間; 佢唔要我對佢特別關注, 同佢按摩佢會發難, 抱佢又會手撐腳撐; 佢只想有人陪喺佢身邊, 但千萬唔好入侵佢嘅私有空間!
刁蠻公主又唔要自己一個咁孤單, 無人喺四周佢又會大聲嗌!
大部份時間都放佢坐梳化, 佢最enjoy居高臨下, 我就唯有喺佢周圍搵嘢搞, 將啲擺設抹完又換位左擺右擺, 視覺上比自己有啲新鮮感, 話比自己聽生活要從新出發!
 |
| 無人看守即使一瞬間都係要落地較安全啦 |
一生人養過八隻松松, 七隻都返咗天家喇, 見到amazon好多刻有好有意思字句嘅相架, 就想換吓; 阿女話換啦換啦, 有啲新鮮感心情好啲㗎, 二話不説就同我訂喇!
收到後又有啲嘢做吓, 首先要晒相, 然後從新排列整系列有關別離嘅裝飾同相架, 每晚深夜自己一個靜靜欣賞期間, 都會回憶起好多不同片段, 尤其波波剛剛離開, 鮮活嘅記憶一下就湧滿心間, 又會好唔爭氣眼涙蓄滿雙眼!
"面對, 接受, 處理, 放下"呢八字真言, 我仍努力喺最後階段, 無論經歷是苦是甜, 所有時刻仍然要過去, 喺一切痛苦與歡樂之下, 生命仍然靜靜流逝, 喺同一星空下永不重返!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
