波波離開第21日, 表面一切回復正常, 一家人都如常生活, 但無人會喺我面前主動提起波波, 因為所有關於波波嘅周邊, 都會攻陷我防線, 佢哋唔想衝擊我😔.....
我最怕無心理準備下講及波波！
其實理智回想, 波波係應該選擇離開, 雖然無見到有明顯大病表徵, 但佢就越來越乏力, 基本生活質素都維持唔住, 眼仔睇唔到再加上行唔到, 對佢係重力一擊, 佢除咗瞓就係食; 雖然佢係好努力進食, 但都敵唔過衰弱嘅身體, 食咗都唔吸收, 任憑我點努力都無預期效果, 眼見精力慢慢離佢而去, 再留低只係受苦, 我真係心痛至極!
 |
| 波波, 我最疼愛嘅波波..... |
我知道波波已經好努力, 祇要佢唔放棄, 媽媽一定堅持陪住佢走, 但我有感應乖仔已經行到終極; 當我開口同佢講, 唔好掛住媽媽, 唔好唔捨得, 係適當時候就要放手, 媽媽會陪伴到最後....
要咁開口真係好痛心, 但我一定以佢舒服行頭, 勉強無幸福唔好再逗留!
莊子所言, 死亡係無法抗拒嘅改變, 只可順安天命.....
只係, 我哋都有太多不捨, 彼此太多牽掛唔想放手, 想起去到最後, 佢都拼命為我留守到最後一刻, 我又點捨得放佢走?
但生有時死有時, 人間一切, 萬物有時, 死亡係必定嘅, 不捨都要接受!
波波係我心頭肉, 每日仍然感受住五臟六腑喺度泊泊流血, 唔識形容嗰種心痛嘅感受!
傷口有無可能會復原? 但失去波波嘅傷心一定會永遠停留!
|
| 無論任何時候, 都會從佢眼仔睇到佢對媽媽嘅依戀同信任 |
14年來, 同波波嘅日常有太多回憶,
見到乖仔每件日常用品都會比我好大觸動,
每件物件都提醒我用嘅主人已經離開, 今後唔會再用....
實在太多不經意嘅牽引令我反複淚目,
今日偶然望見乖仔個艾灸盒, 我眼淚再次失控.....
現實真殘忍, 你想靜靜療傷, 但觸目所及都係對你情緒嘅挑動!
深夜聽歌,聽到呢幾句實在深有同感, "想念是會呼吸的痛💔
他活在我身上所有角落.....想見不能見最痛"
但人, 感覺難過嘅時候, 都係應該要喊出嚟,
眼涙係身體承受唔到嗰部份情緒, 流咗出嚟就唔會淤塞, 可以喊未嘗唔係好事,
我相信發洩到一個點, 就可以跨過去!
唯有多想想呢14年彼此朝夕陪伴, 喺最後時段有小心呵護, 佢小小嘅身體每日都喺我臂彎裡安睡, 我相信媽媽嘅愛有令佢安心, 依家回望, 彼此曾經咁親密相愛, 此生亦無憾!
波波離開3星期喇, 俗語講嘅三七, 但我無見到佢返嚟, 但琴晚半夜達達突然吠我起身, 帶佢去尿尿後我就返入房再瞓; 當我瞓低落床突然就聞到好香嘅氣味, 係全間房都香噴噴, 大概持續咗10分鐘, 呢種香味好似豬仔用緊嘅其中一隻shampoo, 我即刻想起波波....
波波, 傳心時你强調要香噴噴咁走, 你依家就香噴噴咁返嚟嗎? 你係用另一個形式話我知有返嚟探媽媽? 香氣係一個記號嗎?
但我見唔到你.....
不過唔緊要, 無論你有無返嚟, 用乜嘢形式返嚟都好, 乖仔唔現身一定有你嘅考慮, 我信你係為媽媽好, 反正你一直存在我滿眼滿腦裡!
波B, "往後餘生, 目光所致也是你!"mp4-往後餘生
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
