 |
| 相片連結 |
唉, 心情唔好, 但只可以默默承受心痛, 有心理準備同要接受始終係唔同!
原來最差嘅感覺係你唔想將件事喺腦中再go through, 2年多前姐姐發覺身罹惡疾, 呢段期間佢一直struggle, 但結果係唔好!
心情唔好更需要出去透吓氣, 又帶3隻豬落街, 可惜一落樓下已經覺得天色差, 行咗一陣仲落雨呀 :(
要發生唔順心嘅事, 感覺總係接二連三, 或者自己心情唔好, 少少事都令人煩燥 :(
琴日同達達浸浴, 突然微泡機條喉鬆咗出嚟, 出水位如同強力水柱, D水噴晒落我度, 一下間成個廁所地面比水浸晒; 其實我都唔算反應慢, 已經立刻將入水喉移離浴盤, 但吸咗入機嘅水未能終止, 就攪到頭都大!
達達已經濕咗身, 點都要繼續, 就踏住水著住濕嘅衫, 用微泡花灑同佢沖啦; 踏入深秋, 會越嚟越凍, 達達毛毛應該會隨住天氣轉冷跟住老路行; 同佢沖涼明顯覺得毛質差, 亦開始乾旱喇, 當然比之前薄咗啦; 老實講我無意外, 但做咗咁多嘢話無失望係假; 事與願違, 好多事實話比我知, 人力原來係好渺小㗎!
同達達吹好毛跟住仲要做一大餐, 想靠工人姐姐係無用, 當你自己成隻落湯雞咁想快手清咗地下嘅水, 然後沖涼換衫, 見到姐姐慢條斯理咁做, 我寧願自己勞動喇!
算係將件事做好, 已經攰到快散, 點知又嚟一件仲難攪, 令到我頭都大埋!
一向係電腦白痴, 每遇到呢類難題我最怕; 唔知點解無端端又上唔到網, 將D線左插右插攪咗一大餐, 又電話求救跟住指示去做, 終於電腦上網OK喇, 但wifi又用唔到, 叫我reset過router, 嘩! 咁深奧, 我點識呀 :(
攪到身水身汗都攪唔掂, 還好終於阿女幫到!
我雖然生性緊張, 但仍算堅強, 大大小小不如意事我係接受到, 人生不如意事十常八九, 唔開心都係徒勞, 只係....
猶如睇一個悲劇, 由開始睇到落幕, 預計到悲劇個結局係唔會好, 但一幕幕咁去感受, 過程都係苦!
慶幸有3隻豬仔, 時不時要我分心照顧, 咁會將現實中嘅不快暫時拋諸後腦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
