 |
| 等緊見醫生 |
好開心, 諗住終於大家都可以瞓個好覺!
點知入夜波波就開始咳, 咳到好似快透唔到氣, 嚇得我瞓咗落床都即刻彈起, 整好個霧化機比佢聞氣!
插過喉, 對本來就氣管敏感嘅波波, 有咁嘅反應唔出奇, 我有心理準備, 都應該要比時間條氣管仔過渡, 幾年前洗牙波波都咳咗一日先停止, 我唔擔心住 😅!
到咗第二日25號聖誕, 波波似乎咳得更犀利, 仲好似有D唔順氣, 即刻三料齊下, 色光, 霧化+氧氣!
做完呢個治療係可以舒緩短暫時期, 但無幾耐咳又開始; 我已經比咗順勢療劑, 可能藥性太溫和今次唔可以遏止, 唯有密D比佢聞氣啦!
26號boxing day, 波波好似情況更差, 咳到唔停止, 我開始擔心, 又開始胡思亂想嚇自己; 之前fb睇過有狗狗洗牙脫咗14隻牙齒, 10日後離奇暴斃, 我又將負面嘢自己套入去😢!
雖然今次波波洗牙整個過程好順利, F醫生做咗充足準備, 但後遺症係無從估計, 點發展係無人知, 我都係盡快帶波波返去覆診一次保險D!
即刻約醫生, 點知F醫生放假要29號先返嚟, 我又想跟返F醫生會放心D!
唯有自己小心monitor住, 有唔對路就去VSH啦!
 |
| video:波波咳咳 |
27號 - 突然記起有樽順勢草本療劑, 之前祇用過一次; 草本藥佢哋好抗拒, 但今次情況唔同, 咳到咁嚴重, 逼住要試!
28號 - 波波明顯好轉, 咳嗽緩和落嚟, 已經無再咳到唔停, 有進步就放心D😀!
29號- 帶波波覆診, 我呢個緊張媽媽一早出發, 去到診所未開門啦, 唯有帶波波去公園坐吓 😉!
終於見到Dr. F喇, 做個檢查, 心肺好清, 唔使擔心啦, 都係氣管敏感仲有痰, 開藥緩解啦!
醫生知我唔太想食西藥, 化痰比supplement類, 舒緩氣管要用藥喇; 但佢開嘅藥係比我加入霧化器, 從氣管直接吸入, 相對其他器官影響唔大, 係最好嘅方法!
多謝Dr. F咁配合我呢個麻煩媽媽, 為波波設想週到, 遇到咁夾嘅醫生係我福氣, 希望波波快D藥到病除; 之前好絕望, 唔知去邊搵個夾嘅醫生, 原來上天會有指引話我知!
之前太心亂, 忘記咗多謝Ka為波波傳心, 比佢有準備好去洗牙, 配合得咁好; 再要多謝A今早嘅提點, 有時見到醫生真係會忘記重點提問🙂!
仲有兩日2016年就過去喇, 對我嚟講今年唔係好時年, 佢帶走咗小豆b, 比我極端傷痛; 希望來年會帶比波波達達身體好, 所有病痛都可以under controlled, 於願足矣!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
