以往嘅每一年, 每一個節日, 只要外面有相關佈置, 我都會帶住3隻豬, 通處去攞景影過節主題相, 然後又巴巴閉閉喺屋企再搞一次, 一年裡面總有好幾次!
今年見到好多地方都有特別佈置, 更有大型雪地場景, 地點都就近屋企, 換作往時我一定唔會放過呢種特別主題, 會帶住3隻豬, 去影個夠本自娛, 但點解今年我完全提唔起興趣?
 |
| 圖片轉貼 |
曾經覺得太刻意, 每年做同樣嘅事, 好似變咗例行公事, 已經失去義意; 但原來要堅持, 都需要動力去支持, 今年失去豆b, 變得完全無興緻!
一落樓下已經見到屋苑做好聖𧩙佈置, 更挑動起我傷處, 又回憶起小豆b, 3隻豬少咗個親善大使, 好似做乜都無曬意思!
 |
| 任何節日都會想起豆b |
朋友叫我放開D, 生命從來掌控唔容易, 要好好珍惜身邊呢兩隻豬, 天知道佢哋仲可以陪伴我幾多個寒暑? 仲有幾多個節日可以共處? 影主題相又有幾多次?
明白佢講嘅係真理, 但聽落就更傷悲, 呢半年來認識嘅朋友失去心愛嘅狗狗有好多次, 唔係話避開呢個話題就可以!
反正都會帶佢哋出去, 睇邊日有心情就隨緣影D, 唔會再咁刻意!
阿女旅行返嚟一落機就叫我出去, 要補祝同我食生日飯, 頻頻撲撲所謂何事? 我收到份心意就可以喇, 反正我都無心情出去!
老公就一定要買餅, 無個生日蛋糕好似對我唔住, 是但啦領咗佢份心意, 叫佢落樓下隨便買個就OK!
阿女叫我許願, 唉, 願望成真唔容易, 但都係每年同一願望, 祈求一家身體健康, 如願足矣!
叫阿女幫我同兩隻豬影合照, 皆因突然記起朋友嘅金句, 佢哋仲可以陪伴我幾多個寒暑, 我哋仲有幾多年可以喺我生日共聚😢!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
