今日終於收到呢本書, 祈盼會帶比心靈一點慰藉溫暖, 自從豆b走後, 我覺得自己好眼淺, 一首歌一闕歌詞, 一句朋友嘅問候都會淚濺!
經歷過6個毛孩遠走, 發覺叻叻同豆b嘅離開令我最難受,相比起其他4個毛寶貝, 佢哋都走得好撇脫; 雖然到咗最後階段, 都要不停轉換食物口味遷就佢哋胃口, 但呢個時期好短, 去到要用針筒餵食嘅時候, 我已經接收到明顯訊號, 佢哋係時間要走, 我無抱有幻想佢哋可以再逗留!
又或者換個角度去講，除咗bebe都係10歲離開，安安、樂樂，精精都有15、6歲，都算係一個正常嘅高齡狗狗，要離開都尚可接受!
別離當然傷痛, 但會理性接受!
但叻叻同豆b,我曾同佢哋一齊努力加油, 長時間用針筒將食物餵入口, 經歷過一場艱苦嘅奮鬪!
一幕幕一齊奮戰嘅片段, 每回憶起都迴腸百轉, 亦確曾見到有好轉, 原來祇係曇花一現, 海市蜃樓!
不停經歷高低起伏, 天堂地獄咁兩面遊走, 時而好轉帶比我希望, 最終都希望破滅, 佢哋都係唔可以久留 😞!
 |
| 豆b一直都好黐身 |
經歷過極大精神上嘅煎熬, 亦好懷念佢哋同我有過嘅親密互動, 唔係每個毛孩都會咁黐身, 緣份咁深厚; 失去豆b同失去叻叻一樣感覺錐心刺痛, 每日要如常生活我實在唔敢觸碰到傷口!
回想失去叻叻, 我經過咗半年時間將憂傷沈澱, 破繭而出; 今次失去豆b, 我會多利用書本嘅幫助, 希望盡快步出傷痛!
比D時間自己, 順其自然過渡就好!
 |
| 我要相信! |
 |
| 順其自然過渡 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
