 |
| 相片連結 |
weekday都盡量同兩隻豬出去行吓, 週末週日就免喇, 呢兩隻豬好麻煩, 見到其他狗狗好警戒, 尤其波波, 碌到雙眼大一大, 明顯表示佢處於緊張狀態; 出去行吓都係想大家放鬆吓, 搞到咁緊張失去意義啦, 唯有揀選適當時間, 避開放狗嘅熱點同時段, 咁兩隻豬就可以輕鬆透啖氣啦!
呢幾日都有出去, 自己懶時就推車仔落樓下行個round, 天氣好心情靚就行遠D, 或者喺適當時間, 就比佢哋落地跑吓; 不過見呢兩隻豬跑嘅模式, 我又會諗起豆b喇 😢
波波一落地就好似電兔咁, 一枝箭咁喪跑, 完全忘我境界; 達達都係有D慌張, 無人陪住唔敢郁, 要我一路鼓勵佢行!
以前有豆b, 佢真係有大家姐風範, 會照顧吓達達, 好多時都陪住達達跑, 雖然平日打打鬧鬧, 但相處咗咁耐點會無感情吖!
睇返以前嘅相, 好容易搵到兩個女拍住跑, 琴日想影波波同達達, 好難啦!
呢個仔跑得好快, 邊會等達達!
 |
| 豆b會放慢腳步等達達 |
以前真係無發覺豆b係咁乖, 依家就每件事都放大, 明顯睇到豆b係比呢兩隻豬懂事, 我好幸運有佢陪伴咗我6年時間!
豆b走咗6星期喇, 唔知佢依家點呢?
豆b, 好耐無見喇, 第二次見到你眼仔眨眨, 我氣都唔敢透大啖, 好怕我郁一郁你就會消散!
嗰一團光影, 影像模糊但感覺清晰, 我明顯feel到你眼仔嘅光彩, 仲見到你舔脷仔啦!
但你真係無再返過嚟? 你同波波交代過你真係要走喇, 你走後媽媽只係見過你兩次咋, 你可以入我夢嗎? 我真係好掛住你啊!
 |
| 第二次見你就係咁, 坐相同嘅籠相同姿勢, 一模一樣! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
