 |
| 相片連結 |
琴日帶兩隻豬落去, 比佢哋喺屋苑週圍行個圈, 順便影吓主題相, 屋企就唔做大project喇, 無乜興趣!
每年同佢哋影相都會遇到鄰居, 傾吓偈大家比面會讚吓兩隻豬仔有趣!
琴日見到個物業管理員, 行過嚟又搭兩嘴, 佢好熟絡咁問起豆b, 問我影相點解唔帶埋嗰個女.....
完全出唔到聲, 喉嚨突然封住眼湧淚水, 唔識答佢😭!
好怕喺無心理準備下談及豆b, 我仲未可以當一切已成過去!
其實我已經盡量避開佢, 自從豆b走後, 每次帶兩隻豬出去, 我都加快腳步行咗去; 呢個管理員都有養狗狗, 好自然出出入入都會傾兩句!
我呢3隻豬, 祇有豆b可以比佢摸吓唔抗拒, 好自然佢一定記得呢粒女, 我就係怕佢問起我難面對!
豆b走咗快兩個月喇, 時間過得好快, 但我復原得好慢, 碰到傷口我仍然會淌淚!
呢幾日天氣轉冷, 波波氣管敏感又唔鍾意著衫, 屋企一定要保持恆溫狀態, 然後, 好自然諗起豆b, 如果佢仲在生, 應該會黐住個電暖墊瞓緊覺; 個電暖墊波波同達達都唔會用, 今年...已經唔再需要呢個準備喇🙁!
6年來, 二千幾個每一日嘅回憶, 千絲萬縷嘅點點滴滴, 點可能兩個月就煙消雲散?!
 |
| 豆b,你依家已無必要著衫, 亦無需要黐住電暖墊喇, 你唔會再怕凍凍啦! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
