2017年8月12日星期六

全力以付

兩隻豬一齊坐窗前望吓外面, 見到有人游水嘅動態, 頭仔會郁晒😀

兩隻豬仔病情算係塵埃落定, 亦已選擇好要行嘅路, 路途仍得繼續, 必須將心情收拾好!
同整體療法林醫生交代一下波波病情, 話佢知決定試西藥, 希望西藥可以將蛋白尿控制到; 醫生好好, 佢話只要幫到波波就好, 亦解釋西藥唔係我想像中咁壞, 只要唔造成依賴, 留意副作用, 小心控制就好.

波波已經食咗三日藥喇, 暫時無見到好明顯唔同, 不過好似有D攰, 可能未適應到, 希望過多幾日會習慣!
重要嘅係隻藥佢要承受到, 再要關注就係佢嘅肝酵素, 不過都要食耐少少先check到, 早兩日嘅驗血報告, 佢肝酵素指數係好好!

達達腦藥仍未收到, 不過之前食過, 表面見唔到副作用, 除咗肝酵素高, 今次會加埋護肝藥一齊餵服, 再堅持幾個月睇睇效果, 先決定是否繼續.

唔出街都比達達望吓窗外嘅世界,刺激多D感觀唔好成日瞓覺

近日真係心情唔好, 今日又見到有朋友狗狗離世嘅通告, 呢隻狗狗係豆b未入主我家時嘅玩伴, 應該同豆b好熟; 琴晚睇相, 見到呢張相好感慨, 呢度4隻寶貝都先後到咗彩虹橋上, 今日又多添一個老友報到!

4隻小寶貝天家再聚

前前後後近來好多朋友狗狗遠走, 但Ka狗狗嘅離世比我最大觸動, 除咗痛惜同可愛小狗永別, 更因為Ka一路以來行嘅路, 方向同我相同!
一直以來我哋互相鼓勵, 並肩作戰, 心意相通, 真心覺得我哋為咗心愛嘅狗狗無怨無悔咁付出, 大家明白壓力幾大幾辛苦; 期間遇過幾多唔認同, 亦曾失望想放棄, 但大家呻吓傾吓, 最後都會互相支持, 咬緊牙關去繼續!
琴日佢同我講, HH離開對佢已係一個結束, 叫我要繼續努力, 我嘅眼淚就奪眶而出.....

HH嘅離開, 戰友可以歇息再邁步, 前路光明美好; 我兩隻豬仔年事漸高, 我又要抖起精神行呢條崎嶇嘅路, 都預咗會面對艱苦, 但佢哋值得我全力以付!
雖然我嘅好戰友已展開陽光燦爛嘅新一頁, 但咁多年源自狗狗結下嘅情誼, 我知道佢一定會繼續支持我走我嘅路!