琴日一早就帶達達去見醫生, 約第一個appointment, 無咁猛太陽希望無咁高氣溫啦; 達達出咗街較精神, 去到診所見到有人有狗就發忟, 自己細細粒仲兇D大狗, 狗狗一行近就開聲閙人, 拖住大狗嘅主人話佢把聲好似上鍊公仔咁, 笑死人!
入去見到馮醫生, 講淸楚達達近期表現, 咁醫生話check咗先, 再決定下一步打算啦; 聽心肺好清, 話佢肥咗😂, 然後要睇口仔, 怕口仔痛唔想食嘢喎; 呢隻惡女十級惡, 大大聲閙人, 不過⋯點惡都要張大口仔, 要逐一排除原因!
口仔無腫瘤, 亦無紅無腫, 跟住按過全身又無痛, 都真係唔知佢做乜, 醫生問想唔想再驗多次血大家放心, ok, 就做啦!
等報告期間同醫生傾吓, 達達會唔會係腦退化影響佢傳導有偏差? 但醫生話達達邊有咁差, 佢有好正常嘅反應, 如果退化去到唔識食, 神態無咁精靈啦!
不過聽我形容, 佢會莫名奇妙咁轉圈又嗌嘈晒, 都應該有早期跡象喇; 腦退化呢種要盡早處理, 有藥有supplement幫助好大!
雖然我係唔想用西藥, 但食咗咁多不同supplement都見唔到明顯效果, 都要妥協喇; 其實醫生建議嘅supplement同依家我比嘅大同少異, 希望compilation唔同會見到差別啦!
好驚去到嚴重腦退化時, 無意識要食, 喉嚨又吞唔下, 咁即使其他器官幾靚, 都會餓死啦; 越想越驚, 權衡輕重都係試吓先食藥, 容後再打算喇!
之後驗血報告出咗, 同三個幾月前分別不大, 唯獨其中一個肝酵素ALT偏高咗喇!
醫生話以佢嘅年紀唔算太差, 輕微偏高唔使用藥, 試試先用supplement幫吓, 睇吓有無改善, 咁我先試試補充順勢草本藥保肝啦!
希望食咗草本, 肝指數會降下, 希望只係外來因素引致佢呢排胃口差.....
順道帶咗波波嘅尿尿再驗UPC, 自己用試紙驗過都仲係有蛋白, 不過無數據唔知個ratio, 都要正式驗吓喇; 好失望今日診所來電, 個報告好差, 醫生建議要用西藥控制喇....
即刻約見醫生, 親自去商討對策!
我已經努力過, 已經無得揀, 雖然明白唔係一切都可以控制, 唔係去到生老病, 唔會有死啦, 但無可避免我感覺好down😭!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
