達達嘅藥已經到齊, 新療程正式開始, 兩隻豬無特別反應, 表面觀察尚可以; 如果好似以前豆b用西藥時咁辛苦, 個療程我一定會終止; 體內器官有無受影響真係唔知, 都要試一段日子, 再見醫生, 再做化驗去確定先知!
我已經寫個服字, 但願今次嘅藥可以幫到兩隻豬!
當毛小孩細時, 會關注佢哋毛髪豐滿, 步履輕盈, 眼神閃爍亮晶晶; 走到今日我嘅要求已經變卑微, 只要有毛髪覆蓋身體, 保護到皮膚已經好好, 仲行得走得已經樂意, 眼仔可以睇到, 話知佢半白都唔再介意; 最簡單嘅正常身體運作, 食得痾得都變咗唔係一件平常事, 肯食、有得痾已經係恩賜; 依家見到佢哋食得開開心心, 屙得正正常常, 我就開心到飛起!
一步一步妥協, 無何奈何接受, 毛小孩就係要教導我哋要面對衰老嘅定義, 就算自己都逃唔過呢過必然會經歷嘅日子!
自己好似無咗以前嗰一團火, 已經磨圓咗好多菱角, 雖然我仍是我, 仍係急燥欠沉著, 但自己覺得真係已經改變咗好多!
兩隻豬仔最鍾意上我床小睡, 喺佢哋有生之年我都想盡量滿足佢, 問題喺比佢哋上咗床我就要寸步不離, 好驚我一行開出意外會跌死😱!
有時見佢哋舒舒服服已熟睡, 但自己難免要行開行埋, 就避迫要整醒佢, 將佢哋先放咗落地先敢行咗開去😞.
朋友話我過份緊張, 行開一陣邊礙事, 但萬一、如果有意外, 我點原諒自己? 諗來諗去, 阿女提議買個BB防跌圍欄保護佢哋; 買咗個床圍, 依家超放心, 就算一齊瞓都唔怕踢咗佢哋落去😝!
今日收到之前訂做嘅一條頸鍊, 見到實物我好滿意, 做得好精緻; 其實我有過猶豫, 究竟係咪太刻意? 但最後都滿足自己, 做個紀念比心頭有份暖意😍!
豆B, Miss you forever!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
