2017年8月22日星期二

飽受驚嚇

前晚真係比波波嚇死, 已經接近瞓覺時間, 正想抱波波落網床, 發覺佢表情好古怪; 佢十二萬分驚慌兩頭望, 但眼無焦點, 坐喺度成身震曬!
我嘗試抱佢落地, 佢一步都唔敢行, 再抱返佢上床就定曬格, 甚至爬低都唔敢, 淨係瞪大眼急速將個頭仔兩邊轉, 個樣飽受驚嚇!

見佢目無焦點兩頭望, 我已經知道佢睇嘢有問題, 用咗幾種方法去測試佢眼仔都無反應, 我十分肯定佢當時係失去咗視力; 老公都話佢係睇唔到, 所以佢好驚; 我唔想去夜間急症, 即刻搵Ka求助, Ka話幫我傳心問問波波, 同一時間叫我即刻搵老師幫忙!

聯絡到老師, 請佢遙距為波波先做治療, 希望有幫助, 老師話會幫我!
跟住Ka text我, 話波波好驚, 驚到唔識反應, 但佢係feel到波波係視野不清, 佢主力令波波安定; 然後到老師覆我, 話波波當時係失去視力, 咁突然失明, 佢當然驚到口呆目定; 老師唔知發生咗乜事, 估計呢D原因大多都係有關腦或眼神經; 老師集中同佢tune咗呢兩個方位, 話佢應該可以見返到個影, 無黑漆一片應該較安定, 叫我第二日帶波波上去比佢親身一探究竟!

當晚我將波波放喺我身邊, 安撫佢要鎮定, 話媽媽會陪住佢, 叫佢放心好好休息, 我就盡人事每隔半小時比一次brain nerve順勢療劑, 當然我係一定無瞓等到天明!
我無驚惶失措, 但個心好難平靜, 當然希望仲有機會幫到, 漫漫長夜專心上網搵資料有關短暫失明!

似乎最吻合波波, 係因為慢性腎衰, 引發高血壓傷害咗腦或眼嘅神經區域; 的確波波從未有量過血壓, 會唔會真係高血壓引發呢個困境?
馮醫生嘅診所無血壓測量設備, 我決定見完老師後要搵間診所, 有齊備嘅儀器, 見一見醫生先睇睇目前有咩可做; 等睇眼科仲需要成個星期, 萬一真係傷咗視覺神經, 希望可先做到少少補救處理!

下午帶波波見老師, 老師同佢做過掃描, 話佢唔似中風腦溢血, 應該唔係有血塊壓住視覺神經, 但感覺佢頭好脹及微細血管有阻滯, 要通返D血管仔; 老實講呢D一般獸醫真係難幫到我, 除非去大醫院做MRl確診病例, 但我一定唔會為搵個原因去做麻醉, 咁情況下我就將波波健康交比老師!
老師治療後話波波視力已經無問題, 叫我帶波波去做多一次治療, 叫埋阿女一齊, 會教佢點做去幫波波, 由佢接手做後繼!

之後就帶波波去新嘅診所量血壓, 亦測眼仔; 醫生話波波視力無問題, 至於前晚短暫失明, 佢未遇過呢D病例; 波波唔似急性青光眼引發, 亦無發炎紅腫嘅問題, 不過波波眼仔白白確定唔係自然晶體老化, 係有白內障喇, 失去視力嘅機會亦會隨住時日過去而增加😒!
至於講到高血壓引起眼睛視網膜脫落問題, 佢話貓貓較常見, 而波波唔似有呢個問題, 但神經是否有損, 就因為白內障阻擋佢無法睇眼底, 要眼科進一步去追尋底細!

不過波波琴日量度血壓的確係有高咗, 正常應該80－130, 波波有180呀!
不過醫生話波波太緊張, 必定有影響結果, 判斷為高血壓一般仲要檢測其他相關徵狀, 但呢D徵狀波波無啦!
所以醫生認為現階段算正常, 過多幾星期再量多次比較吓個數據!

眼呢方面暫時無急切問題, 我可以放心等專科診症, 做得嘅就盡做, 但就唔會考慮做嘅治療需要麻醉喇; 我有再問醫生滴castor oil會否對白內障有幫助, 佢話傳統醫生應該唔會建議, 喺醫生角度除咗手術, 白內障係無法去除; 只要無敏感問題, 滴油唔會做成傷害嘅, 好多乾眼症都會用礦物油滴眼睛!
事實波波唔滴會卒眼仔, 滴咗佢好受落, 當然幫到白內障係bonus, 但目前都幫到佢舒服, 無傷害我就繼續滴啦!