 |
| 相片連結 |
早兩日收到診所通知, 話波波嘅驗尿報告唔好, 今朝一早帶波波見醫生, 睇吓應該要點做; 感覺好無奈, 明明見波波近日表現有進步, 又食得好好, 以為今次個報告一定好; 真係希望越大失望越大, 上次報告咁好, 點解今次咁大退步? 我究竟做錯咗邊步?
見到馮儀醫生, 我話要同波波驗埋血喇, 報告咁差都怕腎功能唔好, 睇吓去到邊個stage, 要用西藥就盡地一煲; 無可奈何兩隻豬都要用傳統西藥, 我投降喇😖!
感恩波波嘅驗血報告幾好, 咁我叠埋心水將佢嘅蛋白尿攪好啦!
兜兜轉轉行咗咁大個圈, 我努力咗咁耐, 到最後結果都係不從人願唔討好😞; 唔敢希望西藥有好大改善, 可以穩定舒服咁行落去, 我會去做!
仲要希望佢哋接受到西藥作治療, 如果令佢哋更辛苦, 唔係我意願, 我會放棄呢個用西藥嘅打算.
我最怕一食西藥又攪到肝酵素高, 一廂情願諗住用順勢草本護肝做防護, 但同澳洲順勢療師作過溝通後, 佢話唔好; 波波同達達食嘅西藥, 同草本藥某種成份有衝突😓, 建議用返順勢療劑做保護!
為安全計, 食西藥其間唔攪咁多喇, 越簡單越好!
有咗長期病係一條單程路, 只祈求行得舒服, 藥物帶來嘅副作用係點, 到呢步都已經理唔到.
兩隻豬一下由BB變咗老人家, 歲月不饒人, 年紀大開始機器壞; 希望仲有空間去修修補補, 保持到正常生活質素!
收拾好壞心情, 抖起精神再邁步, 從來要做嘅我都好頑固, 會盡力去做好, 不過接到壞消息, 一下情緒起跌控制唔到😟, 咁真係失望又諗唔到嘛!
我都祇可以見步行步, 搵個令佢哋最舒服嘅方案去做, 先顧咗眼前嘅腳步, 後路顧唔到喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
