 |
| 相片連結 |
距離上次波波出事又過咗個多星期喇, 呢段期間我有小心觀察住, 無發覺波波視力再出問題, 當然有帶佢再見老師, 再做靈氣治療, 無可能坐以待斃嘛!
老師話佢頭仔都係脹, 再集中做右邊眼仔, 不過老師話佢未係嚴重, 唔驚有腦仔爆血管問題, 咁我都無咁閉翳; 再過兩日又去見老師喇, 呢個星期大部份時間都集中照顧呢個寶貝仔!
今日, 終於等到去專科醫院見眼科周醫生, 我最想確定波波視覺神經有無問題!
周醫生檢查後話波波一切正常, 視覺神經反應都好, 無青光眼無眼壓高, 但白內障已經developed, 視力唔會好除非做手術!
佢話照睇眼嘅情況成功機會都高, 一隻有 95%康復, 右眼較差做手術估計都只有85%睇到, 正常身體健康嘅狗狗, 呢個手術本身風險唔算高; 不過每個身體, 每個手術都有一定風險評估, 唔排除即使做咗手術, 都有可能有機會出現嚴重併發症; 例如有青光眼風險, 到時都要再做摘除眼球手術; 仲有其他如視網膜脫落, 細菌感染, 眼球內出血, 種種情況雖然唔一定遇到, 但我都一定要知道!
無論有幾差有幾好, 我早有決定唔會做麻醉, 唔會做手術, 除咗衡量視力問題, 佢身體狀況都要兼顧; 目前波波麻煩多多, 蛋白尿剛開始試新藥, 有無其他器官受損都未知道, 又未到無得揀嘅地步, 我唔敢博呢鋪!
但凡手術都係一個挑戰, 要面對可能發生嘅意外, 無論手術中途, 或者後遺症都可能遇到; 網上見到太多手術中出意外, 身邊好友狗狗做嘅手術本身係成功, 但亦遇到意外而最終生命都保唔到; 朋友狗狗早前亦做咗呢個手術, 但過咗6個月出現青光眼, 眼球最終都係要摘出, 會唔會唔做仲好?
無人預料到答案, 我決定靜觀其變見步行步, 宗旨要堅持, 手術只會因為要減輕佢痛苦!
正統專科除咗手術無嘢幫到, 唯有繼續滴castor oil, 即使白內障幫唔到, 但起碼佢唔卒眼較為舒服!
又再次為個仔揀咗一條算係唔正規嘅路, 但願我無選擇錯誤, 保得住佢視力惡化得無咁早, 比我哋時間慢慢過渡!
祇要佢唔痛, 祇要佢無辛苦, 視力漸漸失去我會催眠自己接受到, 見招拆招, 再決定下一步.
今日見完醫生, 返屋企前比佢跑吓步, 佢跑得好快好好, 視力仍未到好差嘅地步; 我就按兵不動, 平常心面對就好!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
