波波眼仔差, 由一歲開始就發覺有唔妥要見獸醫喇, 十年來因為眼仔見獸醫嘅次數都近十次, 包括見咗幾次專科啦; 話多好似唔算太多, 但話少又真係唔少, 我養過咁多隻狗狗, 都係唯一係佢要見眼科咋！
近來見佢眼仔越來越白, 眼科話呢種係正常晶體老化唔係白內障, 唔影響視力咁算啦, 講到"自然老化"呢幾個字, 真係無得攪, 最多都係食吓supplement 希望延緩老化, 無奈都要接受喇!
問題係波波會卒眼, 見佢好慘, 一路行一路卒好辛苦咁, 仲會刻意瞪大對眼; 上次見佢眼都凸晒見Dr.Ma度過眼壓, 係高咗㗎, 要滴降眼壓藥水, 之後再覆診係正常返啦!
雖然之後followed咗兩次專科, Dr. Chow都話唔係青光眼, 眼壓無高無需用藥, 見到佢眼仔咁唔舒服, 都只敢沖生理鹽水, 唔敢亂用藥啦, 但都有擔心其他因素, 例如敏感眼痕影響到佢嘅眼壓, 好似上次咁啦!
又無可能每次佢卒眼, 眼仔瞪大就去驗眼壓嘛, 佢三朝兩日都係咁, 我可以點辦? 成日見醫生都唔係辦法, 亦無可能亂滴眼藥, 呢D係藥物唔可以用作預防啦; 如果唔理等到有事, 嗰時非要滴仲衰, 見網上有家長分享, 呢種藥長滴會影響眼球, 最後控制唔到都要眼球摘除咁就慘😓, 都係要搵個預防辦法!
個腦又轉向天然療法, 最希望可以用一種幫到, 又無傷害嘅方法!
年幾前因為波波眼仔開始白, 以為佢係白內障做過資料搜集, 知道滴castor oil有幫助, 後來醫生話唔係白內障我就停咗喇; 最近再仔細睇資料, 有講到眼乾, 青光眼都啱, 咁我想比波波用返!
我想再試清楚D呢隻油滴咗會唔會"拿"眼, 為安全計自己先做白老鼠啦, 上次只試滴咗兩次, 今次試足一星期啦, 試清楚D個感覺先幫波波喇!
狗狗有唔舒服唔識講, 自己滴咗一星期, 應該有個大概喇; 每晚瞓覺前滴完雙眼會矇晒, 係油劑呢個反應好正常啦, 但第二朝起身對眼舒服晒!
開始同波波滴返, 自己都唔停喇, 自己都感覺幾好, 每晚齊齊滴咗就瞓覺!
見到波波少咗卒眼, 對眼仔都無瞪到咁大, 琴晚阿女幫佢做reiki話佢眼仔好咗, 無之前咁扯能量喇🙏!
希望呢個天然療法幫到波波啦, 唔貪心會唔會幫到眼仔白, 起碼幫到佢舒服唔卒眼, 已經好感恩喇!
http://www.life-saving-naturalcures-and-naturalremedies.com/natural-remedy-for-cataracts.html
https://www.earthclinic.com/pets/cataracts.html
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
