病咗兩星期, 咳到聲都無咗, 差不多兩年無病, 一病辛苦到無命; 記得好清楚, 上次病到死係無工人姐姐時期, 自己仲要做餐死, 今次比上次好D, 有姐姐幫忙執頭執尾!
不過比個病更折磨我, 係我好擔心波波, 一直以來佢眼仔都有唔妥, 近來見佢隻眼仔嘅白色範圍大咗好多, 如果係自然老化都真係無可奈何; 自從滴咗castor oil, 已經好咗好多, 佢甚至無再卒過; 隻眼仔好正常無紅腫, 甚至無眼水多咗!
我其實無發覺佢有唔妥, 佢行動如常識去搵厠所, 亦無亂碰亂撞我無咗應有嘅警覺, 直至到我set咗個床圍, 我發覺佢好唔妥!
床圍中心係網狀, 理論上佢應該透過床圍都見到我, 但我發覺佢每次望我都昂起頭, 即使我坐低喺床圍下試探, 無論我掦手, 拎零食引誘, 佢都唔識望我😥, 連達達呢隻呆豬都識望我方向, 點解波波咁異常?
真係好驚, 無聲無息咁就盲咗? 係我用castor oil嘅錯? 但明明見到有好嘅改變喎, 起碼佢無每日不停卒眼舒服咗好多!
如果命運係咁, 就唯有當呢D係佢今世要遇到嘅功課, 如果命中註定係因為我, 咁唔做都做咗啦, 我點都還唔到比波波😭!
阿女話未必同油有關, 如果唔受得應該反應有唔妥, 佢似係漸進式老化, 我咁擔心不如去見見眼科; 佢話如果波波已經盲咗都仲咁精靈, 我哋日常都唔察覺異樣, 適應得咁好唔使擔心咁多喇; 何妨阿Q上身, 見眼科後積極D行個正確方向!
即刻book 眼科, 都知攞個快期好渺茫, 事實佢又唔似急症, 睇落都正常;早前見有群組話周醫生要book到10月頭, 但我都係要盡力同姑娘講講情況!
專科醫院姑娘好幫手, 話近期都full咗, 但可以攝個期比我, 都要等兩個禮拜, 叫早D去等等喎; 已經好例外, 有得等我仆到去囉!
我信命, 如果波波注定係睇唔到, 再早都可以係急性救唔到, 如果仲有機會, 兩星期後希望都仲可以補救到, 睇命數!
好多好多文章話狗狗失去視力無人咁大障礙, 佢哋適應好快, 日常生活多加留意就好!
但作為媽媽, 如果個仔真係睇唔到, 個心除咗痛, 都仲係痛.....
希望經過周醫生診斷, 會比我好消息其實波波仲係睇到, 希望係我過慮, 又係自己攞最壞嘅對號入座咁就好!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
