已經停咗一星期西藥, 亦未開始食草藥, 想睇睇波波嘅反應, 亦比D空間自己考慮清楚往後要走嘅路程!
停藥一星期, 波波無好轉嘅反應, 都係無精神成日瞓, 每餐都係要我餵食, 見佢咁我好心亂, 都唔知要做咩決定!
又無驗血數據參考, 都唔知佢邊度唔妥真係攞命!
決定搵老師幫忙, 睇吓波波到底乜事幹, 但我怕波波抗拒又唔肯合作; 先請Ka幫忙, 遙距傳心再做吓scan睇吓佢依家嘅情況!
Ka比咗我一個答案, 係我忽視咗, 我一直擔心隻藥傷肝腎, 無諗過其他可能性，又做錯😭!
佢話同波波傾咗, 個仔話覺得攰所以瞓多咗, 亦有頭仔痛所以無胃口, 仲叫我唔好咁擔心!
Ka話佢感覺波波係頭仔唔舒服, 就算驗血都應該搵唔到結果, 而佢無feel到肝腎嘅部位特別唔妥, 應該唔會係食西藥嘅副作用; 早前阿女都有講過, 波波係頭差過尾, 但我固執將佢講嘅跳過, 基本上任何人講我都聽唔入耳, 認定食西藥就係錯😥!
頭痛會係血壓高? 血壓問題我從來無好好諗過, 一直擔心蛋白尿腎衰竭, 但咩原因有蛋白尿無想過, 睇過嘅醫生亦無解釋無提起, 我亦無資料搜尋過!
未到一個點好多嘢都唔會浮現, 都係命中注定要錯過 !
琴晚上網focus喺呢方面, 搵到嘅資料係我以前未見過!
原來高血壓會引致蛋白尿, 要用藥降血壓先可以有幫助, 所以之前一味針對腎臟, 無對症下藥就幫唔到, 食咗隻降血壓藥就到point, 所以就見到成果!
同阿女商量, 咁究竟食唔食隻西藥好啊? 佢成日咁瞓唔得喎!
阿女訓導我😂......
針冇兩頭利, 睇下波波點樣舒服D就做邊樣, 既然隻藥幫到就食囉, 世上無萬全之選, 好可能你好盡力處理一個問題, 但都可以因為其他嘢突然死咗, 揀咗就要心安理得, 醫生都無辦法更加確定咩係絕對正確啊!
驚係冇用嘅, 我哋作為人, 身體都唔會無問題, 咪又係唔多理, 到時先算, 你何必不停自己嚇自己呢? 你唔可以因為掛住擔心一件事就完全放棄正常生活, 你嘅生活除咗驚仲有咩呢? 唔死又點呢? 生活質素同內心平靜係好重要嘅, 你睇埋咁多動物書, 應該同動物學習吓看透生死, 開開心心過日子!
都帶你去睇戲, 套戲都講咗, 活在當下, 愛過玩過開心過, 夠鐘死咪拜拜囉, 宇宙某處會有我哋相遇過嘅印記, 而個記憶應該開開心心, 唔係驚驚驚驚..
既來之則安之, 好好過日子啦!
波波方面, 你已盡力, 波波知道, 感激嘅!
所有生命都總會要死, 問題係由而家到死時係開開心心定疑神疑鬼咩都驚? 希望你比到波波嘅energy係正面開心, 唔好當佢死緊頭咩都唔比佢做, 人哋D狗生cancer又盲又唔行得, 都會帶佢哋出去吹吹風, 感受一下外面嘅空氣; 明顯波波一出街心情靚, 會笑, 狗狗嘅senses同我哋唔同, 佢哋對環境好敏銳, 同佢出多D去啦!
其實我覺得好多人同動物, 都寧願玩多D開心D死快D, 都唔想坐喺屋企長命百歲!
正面D研究吓有咩辦法, 有無D supplement比多D energy唔好咁攰, 食到瞓到有D精神行吓唔理副作用啦, 佢都11歲囉, 食唔食西藥都唔會活多10年, 舒服就算喇!
做得嘅盡做, 唔好大家咁大壓力, 保持平常心, 盡人事聽天命OK啦!
唉, 比個女講到我眼濕濕, 無反駁嘅理據, 都好安慰有呢個女, 比我成熟理智; 咁我決定豁出去, 繼續用西藥幫佢, 我會買個血壓計, 幫佢mon住, 唔想去咁多診所比更大壓力佢, 然後再同醫生商討, 睇吓用咩supplement幫佢!
約咗過幾日見老師, 等老師再幫佢做治療, Ka問過波波佢並唔抗拒, 唔係抽血吉針做咗感覺舒服嘅, 佢願意去!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
