一年前嘅今日, 呢個時間, 豆b離開咗我, 我仲記得好淸楚, 當撫摸住佢已經完全靜止, 但仍然溫暖嘅身體, 我個心好似裂開咗😭!
過咗一年喇, 每一日我都會諗起呢粒豆, 完全無感覺已經過咗365日; 不過, 確實已經漸漸適應, 可以接受再無豆b望我嘅熱切眼神, 亦習慣無咗豆b時刻隨行!
老公間中都會輕輕帶過, 無諗過會咁快送別豬豆, 明明豆b仲好精神, 咁就走咗點可能?
如果, 知道佢咁快走, 我會.......
唉, 都係感覺愛得唔夠有遺憾!
 |
| 老公一直都好錫豆b, 難怪豆b走咗佢咁難過😢 |
永遠唔會忘記豆b走前嘅一日, 佢好特別嘅眼神, 嗰種凝望既依戀又深刻, 自己已經隱約知道, 我哋快要到分離時份; 其實唔需要好朋友Ka傳心, 同豆b已經心連心, 知道佢大限將降臨; 只係朋友幫忙接收豆b嘅訉息後, 我可以盡量做得無遺漏, 希望滿足到乖女最後嘅要求!
今日睇返當時同Ka嘅對話, 真係百般滋味在心頭😢, 得到Ka允許, post出我哋當日對話!
Link: AC with Dau b
豆b離開後呢一年, 見到好多毛孩遠走, 有長期抗戰, 亦有殺個措手不及; 但見到每個家長都全力以赴, 照顧到最後一刻, 我亦理解懷住愛陪伴到最後, 已經足夠!
適當時間分手都係一種幸福, 不捨一定有, 傷心過後, 但願可以勇敢向前走, 我要努力學習 - 要盡全力, 但唔強求!
兩個多月前Ka嘅寶貝遠走, 見到佢寫咗呢句"掌中鳥, 需鬆手, 始能飛" 我好佩服佢睇得咁通透!
的確再不捨亦要鬆手, 要捉亦捉唔實, 愛長存, 暫且放低今生嘅緣份!
祈盼我哋嘅緣份仍深厚, 我會耐心去等待重逢嘅一日!
睇過有文章分享一行禪師嘅教導, "過去已逝, 明日未來, 在此時此刻, 感受當下, 才能讓人不枉此生!"
豆b離開後, 同佢有過兩次傳心...
第一次係Ka幫忙, 第二次係阿女親自上陣!
3個多月前, 當時鬧哄哄有好多討論, 更有好多聲討, 話寵物傳心係呃人 ....
我以前都真係唔信有呢種隔空傳心, 係自己嘅親身經歷令我有咗信任; 不過我都仲抱有懷疑, 係咪真係每個人都擁有呢種天份?
我會覺得傳心除咗需要高度集中, 最重要係感應力要過人!
傳心成功與否, 都有好多因素, 我自己就覺得如果當時傳心師未能成功溝通到, 一定要誠實!
自從學咗reiki, 阿女對呢D另類科學興趣日濃, 即使當時外間對傳心有咁多負評咁多唔認同, 佢都堅持去學去親身領悟; 佢有心理準備要掌握到竅門係唔容易, 可能最終都係失敗, 但亦可能timing到咗會突然開竅, 反正佢學嘅目的都祇係想可以同自己嘅毛孩溝通😌!
阿女仲未得, 要先練習好集中精神, 佢又去上緊Meditation course, 睇嚟佢都好認真探求呢類學問😌!
Ka都有講要不斷practice, 需要浸一段日子, 要試多D, 有過成功嘅case建立信心就較容易, 比多D時間慢慢去搵當中奧妙之處!
不過當日上課, 有一節係老師引導去connect彩虹橋上嘅毛孩子, 阿女就成功見到豆b😍!
無見咗豬豆好一段長日子, 當阿女見到豆b彈彈跳咁迎面跑來, 佢好激動, 同豆b一句說話都講唔到, 已經喊到完全失控封晒喉嚨😭; 3隻豬當中, 阿女一直係最錫呢隻豬!
佢見到豆b生活得好好, 步履好輕鬆, 跳來跳去面帶笑容; 之後要同同學交換毛孩去溝通, 同學嘅feedback同佢見到嘅景象係一樣, 同學有問豆b有無返過屋企, 就見到豆b從高處望向屋企, 個樣好靚好歡容!
好安慰豆b無忘記屋企, 更感恩佢適應新生活, 我其實應該好放心, 亦相信豆b無論喺邊度, 佢都會自我安排得好好; 既無忘記過去愛佢嘅家人, 又無影響依家嘅新生活, 佢好叻女, 識分辨過去同現在係有唔同!
豆b一直都係開心果, 時刻面帶笑容, 我堅信佢樂天嘅性格會延續, 呢個親善大使, 依家已經升咗級, 變咗親善天使喇😇!
她告訴媽媽, 這麼深刻的愛不是這輩子才開始的,
「不用害怕遺忘, 靈魂不會忘, 當妳莫名的心跳或喜悅, 那都是我在想著妳.」
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
