波波眼仔應該已經睇唔到, 雖然有心理凖備白內障係呢個結局, 但心情真係差到咩都唔想做, 心口好似壓住塊大石, 快呼吸唔到😭!
波波當然要時間適應過渡, 一下間失去視力點會習慣到, 佢依家唔敢行, 成日瞓覺; 我自己都要時間調整心態, 接受現實太難, 塊心頭肉有難, 我真係好想大喊一餐....
喊都可以舒發, 可惜我連喊都有困難, 我係心痛到無眼淚唔識喊!
琴晚見波波動作好古怪, 都感覺佢睇嘢有困難, 但有時佢瞓醒, 又好似自動會好返, 就諗住等佢瞓醒再觀察; 今朝見佢完全無好轉, 最明顯係佢無信心行, 平時出入佢自己嘅廁所同圍欄, 係唔會咁無膽; 今朝見佢三番四次行到走廊前徘徊, 點都唔敢行入去, 佢嘅廁所係放喺走廊中間....
入咗圍欄又唔敢行返出嚟, 用零食利誘都失敗, 我個心好冷!
阿女叫我搵老師啦, 可能仲可以有得掹!
我記得之前老師有講過, 如果視覺神經受傷係可以做得返, 但塊lens厚咗就有困難, 佢未做過白內障 case, 唔知效果㗎, 要試就盡做啦!
祇要仲有一絲希望, 我都仲希望有個機會比個仔, 已經唔選擇麻醉做手術, 唔想將最後機會抹煞!
其實都未經任何測試, 或者我選擇手術, 佢身體都未可承擔, 先唔講麻醉藥對佢腎功能進一步嘅損害, 仲有又要再驚過佢氣管收窄醒唔返....
然後, 再講到術後要絕對安靜休息, 我覺得呢隻緊張豬有太高難度喇!
星期日都急call老師, 老師叫我即刻帶隻豬去.....
老師話波波真係睇唔到喇, lens比之前又厚咗, 係快速咁退步, 今次嘗試用多幾種治療手法去試吓!
做完後老師話波波有少少進步, 好似睇到個影郁動, 再試多兩次睇睇效果有無更好, 咁我都睇睇情況再決定是否繼續!
明顯波波做完真係有改善到, 分別係見到佢可以正常咁行入走廊上廁所度, 佢完全無咗之前嘅遲疑, 不過就似乎唔係長時間維持到!
希望老師加咗新嘅療法真係可以幫到, 希望呢個係老師第一個成功治療白內障個案, 希望波波往後仲可以有少少睇到, 懷住希望後日再帶個仔去老師度!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
