 |
| 相片連結 |
一連 4日每日見老師做能量治療, 老師盡力幫波波boost起視覺神經, 希望對波波有D幫助; 正如一開始老師有講過, 神經受損佢可以幫到, lens變異就應該做唔到, 不過都試吓盡做囉, 我當然唔會比任何機會錯過!
今日做完治療, 老師話其實波波從完全睇唔到, 到依家可以見到光影, 係有輕微進步; 但咁短時間從本來睇到而行到呢步, 佢適應唔到, 呢些微進步對佢嚟講係等如無; 今日老師放佢落地佢都見我唔到...唔通又已經去到盡路?!
老師話波波今日好差, 係果種情緒心力都虛耗, 佢表示好攰好似無晒力, 佢唔鍾意呢種現狀但改變唔到!
我真係唔知邊方面出錯, 事實食降蛋白尿藥前一切都好好, 除咗蛋白尿有個差嘅報告!
我唔敢太固執, 死都唔肯用西藥怕會拖垮波波嘅腎功能, 但波波喺兩個月間視力, 體力都急速差咗, 除咗食咗西藥降蛋白尿, 我咩都無變過!
有同醫生討論過, 之前食得跑得, 係蛋白尿唔得, 服藥後蛋白尿達標, 但所有都走下坡, 究竟係咪我又選擇錯? 應該堅持唔用西藥, 依家累咗波波?!
醫生話無呢種數據見過, 而且藥性好溫和, 咁究竟邊度出錯? 雖然無回頭路, 但如果真係因為西藥, 我唔想一錯再錯, 事實佢好攰啊; 一直用藥係想令到波波舒服, 但依家佢咁攰精神差咗....
唔敢停藥, 但已經無晒方向, 唯有再搵醫生幫我!
朋友介紹咗醫生, 不過今日我問過, 已經唔再收新症, 但我求姑娘幫我問問, 最後叫fax病歷比醫生睇睇, 再覆我!
眼仔睇唔到我已經接受咗, 我會好好照顧波波, 一段時間後佢適應咗, 日子就可以正常開開心心咁過; 但佢胃口唔好, 又無晒精神, 如果真係西藥對佢咁大影響, 我要搵醫生指導我, 希望醫生會接波波呢個case, 我再開始用中藥幫波波!
為咗cheer up波波, 中午見完老師, 下午帶兩隻豬出去, 兩隻豬都心情明顯好咗, 可惜去完街波波都係唔開胃, 呢個我要迫切解決啊!
希望有緣醫生會見波波, 希望有新解決方案, 我要相信天無絕人之路, 唔得再諗過!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用。原意只想分享我用過嘅產品, 經驗，我養狗狗嘅心路歷程。希望比各主人作個參考咁啫, 醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅情形; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
