之前因為波波無精神, 想搵隻對佢有幫助嘅supplement, A話佢狗狗食緊一隻叫DMG嘅補充品, 佢覺得兩隻豬應該都適合; 呢個產品對自閉症腦傳導都有幫助, 叫我自己做吓功課, 瞭解吓呢隻產品嘅功能!
睇過好多資料, 都有個大概輪廓, 暫時未有報告食咗有任何副作用, 相對都安全嘅, 咁我就比兩隻豬仔試吓都無妨囉!
今日收到貨, 我選用呢隻係人食嘅補充品, 睇咗產品嘅review, 有家長話獸醫都有推薦比動物服用, 咁我就更放心; 選佢嘅原因係因為佢單一成份, 無添加其他物質, 避免吸收咗太多相同成份, 兩隻豬仲有食緊其他嘅supplements嘛; 而佢嘅用量亦容易控制, 有標示每滴容量, 咁我餵比兩隻豬就好放心!
老公去咗旅行, 為咗D豬仔我從來唔肯出門, 如果要老公都唔准旅行, 有欠公允; 其實個心都有D唔安樂, 我自己唔去無所謂, 但咁多年都唔肯陪佢一齊旅行, 都唔係好安心; 好彩老公唔介意, 仲話好彩有我照顧D豬仔, 佢先玩得放心, 兩公婆為咗好好照顧佢哋, 無怨無悔願意付出更多愛心😘!
阿女呢個星期多咗陪我晚餐, 怕我一個人唔慣, 週六同我出外食台灣名氣程班長牛肉麵, 要排長龍啊; 週日就親自下廚, 整我鐘意嘅大蝦帶子, 其實我好幸福啊!
不過有兩隻豬仔陪住我, 我點會寂寞吖, 唯恐服侍不週大把嘢做啦😜!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
