 |
| 相片連結 |
琴日係達達豬11歲生日, 呢排自己都唔多開心, 無心情諗要整咩特別食物, 自己覺得好攰, 一來依家波波要貼身侍候, 三餐都要手餵, 又要帶佢見老師做另類療法, 感覺自己精神蹦得好緊😓!
但儘管攰我都唔想咁偏心, 點都要幫達達慶祝生日, 唯有簡化D做佢鍾意嘅食物, 做咗個啫喱羊菜凍, 呢隻豬鍾意啫喱嘅口感, 就算比bone broth佢都唔要座暖變返水份😅!
達達最近好乖, 唔使我再額外擔心!
一連幾日都帶波波見老師, 嘗試密集療程, 希望效果會好; 見到每次波波做治療都真係好放鬆😊; 唯一老師加入能量更強嘅新療法, 去幫佢做眼仔, 佢話太勁度好唔舒服😒, 有大力反抗典到要我手抱先勉強做得到😓; 不過見完老師後都一定有改進, 從未做治療前唔太敢郁, 到每次做完返屋企都有正常行動, 我唔知佢係睇到多咗? 還是老師同佢有過溝通, 鼓勵佢要勇敢邁步; 總之見完老師佢係有進步, 但美中不足呢個進步唔太持久, 但就意外地竟治癒埋我無咁心痛!
 |
| 波波係好享受好放鬆 |
阿女都不停對我開導, 話我嘅情緒會帶動波波乜都唔敢做, 叫我首先要接受就算睇唔見, 都會適應到, 先可以比到信心波波過渡; 佢話我成日諗住慘呀、心痛呀咁, 波波就會覺得好大件事囉!
阿女叫我要先相信, 呢個係可以克服嘅障礙, 波波先會肯作出調較同嘗試; 佢話動物其他sense比人強, 動物係可以適應得好好, 波波唔係冇呢個本能, 只係太嬌貴, 慈母多蠢兒啊... 😂
佢叫我順應改變, 要同波波一齊適應, 我哋一定做得到...
其實我都係需要D時間過渡嗟, 依家已經接受到; 今日又帶波波出去見老師, 繼續另類療法之路!
老師話波波仍可分到光影黑暗, 比多D光源佢會較易有信心行動; 一於積極D盡量比多D配套, 阿Q咁安慰自己, 相比起其他重病嘅狗狗, 佢都唔算前無去路😅!
點都好啦, 始終要正常生活, 繼續帶兩隻豬出去散步, 可以做嘅就盡做!
後記:今日係11月1日, 突然發覺我將達達嘅生日攪錯, 足足提早咗一個月啊!
呢排真係比波波攪到我擔心到暈咗, 咁失魂真係從來未試過....
唔緊要, 11月 24日, 達豬生日再慶祝過!魄
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
