第三次收到好朋友B媽送嘅禮物, 佢强調話唔係貴價物品, 但每次見到呢類手工製品, 都好自然諗起我三隻豬仔.....就係呢份心, 就已經勝萬金💕!
每次收到佢送嘅禮物, 都有唔同感受, 今次打開禮盒, 見到三隻豬嘅小cushion, 我感覺溫暖又貼心!
真係好多謝好朋友咁有心, 雖然近排因為達達我有D擔心, 但收到呢份復活節禮物, 好似幫我注入咗強心劑咁, 我好開心😄!
達達呢兩日再無傾向抽筋, 但有咗呢D頻密嘅開頭, 我都係有擔心; 連日來猛上網搵料, 都係想嚴重嘅速度唔會發生!
抽筋呢樣嘢好恐怖, 我以前嘅5寶中bebe同叻叻都有抽筋, 都要食西藥控制個嚴重程度, 好不幸呢類控制抽筋嘅西藥, 會嚴重影響升高肝酵素; 叻叻甚至要不停轉藥, 都控制唔到肝損壞程度, 可能細身狗狗更難接受藥物副作用, 然後佢去到肝衰竭, 更進一步拖跨幾個主要器官functioned唔到, 見住呢個過程實在太痛苦, 我唔想達達再走上呢條路😭!
從達達驗血驗尿報告, 加上心肺聽診同過往嘅X光報告, 佢身體唔見得話係認真唔好, 每次驗血醫生都話佢有唔太差嘅報告, 但...每次阿女同佢做reiki, 每次都係話佢唔多好!
表面上睇波波咁多問題, 身體應該差過達達, 但阿女次次都話波波仲係比佢好!
之前因為懷疑佢腦退化睇醫生, 都有商討過達達腦神經問題, 明白一般心肺問題, 都可以初步用聽診檢查, 內臓器官問題, 都可以通過生化檢測得到個大概報告, 唯獨腦...除咗用MRl確診就無其他門路; 當然現階段達達無必要去做, 而我亦唔會做呢個選擇, 始終麻醉都係風險高; 咁要診斷係腦出問題, 都祇可以根據佢表現推測, 再加上排除法去估!
多年前達達下盤搖擺, 已被斷症為腦傳導反射神經遲緩, 幾年後嘅今日種種表現, 好自然我會諗係佢腦仔情況再退步, 年紀大變差咗都係正常嘅路, 只係我無諗過, 原來呢種腦神經問題, 都會影響到有抽筋咁恐怖😱!
暫時達達只算係有抽筋傾向嘅徵狀, 喺咁淺嘅層面上仍然可以用順勢療法, 通常一見佢縮手定格即滴藥, 佢一分鐘內會放鬆, 再加上冰袋敷腰佢就舒服, 整個過程兩三分鐘內就恢復!
但我唔想喺佢有咁嘅傾向時先幫佢做補救, 我希望可以幫到佢唔好頻密發作啦, 如果去到更嚴重嘅階段, 先去想辦法就太遲喇; 唔想重蹈覆轍好似叻叻咁慘, 有前車可鑒我當然要用天然療法!
已經諗咗好耐, 睇過好多篇資料, 亦研究咗群組嘅建議, 參考過有抽筋毛孩家長嘅feeback後...權衡輕重下, 決定用CBD oil幫達達!
見到CBD oil有幾方面都fit到達達嘅case, 我將會訂貨, 希望㚒到達豬啦!
以下有幾篇相關資料, 都比咗我好大鼓勵, 我要正面去睇, 呢個係可行辦法😊!
呢篇講及嘅4種副作用大嘅西藥, 叻叻用過3種😖, 而建議3個方案, 我都實行咗兩樣喇, 決定加埋第一欄!
🙏!http://www.dogsnaturallymagazine.com/3-natural-treatments-for-dog-seizures-and-epilepsy/
http://www.dogsnaturallymagazine.com/cbd-oil-for-dogs/
https://www.innovetpet.com/blogs/news/phytocannabidiol-cbd-for-pets-with-seizures
https://www.certapet.com/cbd-oil-for-dogs/
台灣提議將CBD列入帕金遜症及癲癇病處方:
https://kknews.cc/news/6pq5ylp.html
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
